කෘත්‍රිම බුද්ධිය (AI) හරහා නිර්මාණය වන රූපවලින් එල්ල වන දැඩි තරඟකාරීත්වය සහ අධික ණය බර හේතුවෙන්, ලොව ප්‍රමුඛ පෙළේ ඡායාරූප සහ දෘශ්‍ය අන්තර්ගත සැපයුම්කරුවෙකු වන Getty Images සමාගම සිය බංකොළොත් භාවය ප්‍රකාශයට පත් කරමින් (Chapter 11) යළි පෞද්ගලික සමාගමක් බවට පත්වීමට තීරණය කර තිබේ.
මෙම වසර අවසන් වීමට පෙර අවසන් කිරීමට අපේක්ෂිත ප්‍රතිව්‍යුහගත කිරීමේ ගිවිසුමකින් අනතුරුව මෙම පියවර ගන්නා බව සමාගම සඳහන් කරයි.
Shutterstock ප්‍රතිවාදී සමාගම සමඟ කිරීමට නියමිතව තිබූ ඒකාබද්ධ වීම බිඳවැටීමත් සමඟ සමාගම මෙම දැඩි තීරණයට එළඹ ඇත.
පුනර්ව්‍යුහගත කිරීම අවසන් වීමෙන් පසු Getty පවුලේ ආයතන සහ Koch Equity Development සමාගම විසින් මෙහි 100% ක හිමිකාරීත්වය අත්පත් කරගනු ඇත. මෙම ආයෝජකයින් විසින් නව කොටස් සඳහා ඩොලර් මිලියන 533ක් ලබා දීමටද එකඟ වී තිබේ.
ණය බර ලිහිල් කිරීම: සුරක්ෂිත නොකළ බැඳුම්කර හිමියන් ඩොලර් මිලියන 270ක නෝට්ටු ඉවත් කර ගැනීමට එකඟ වී ඇති අතර, සුරක්ෂිත මූල්‍ය ආයතන විසින් පොලී පිරිවැය අඩු කර ණය ගෙවීමේ කාලසීමාව දීර්ඝ කිරීමට එකඟ වී ඇත.
මෙහෙයුම් කටයුතු: මෙම බංකොළොත්භාවය ප්‍රකාශ කිරීම යටතේ වුවද සමාගමේ දෛනික මෙහෙයුම් සාමාන්‍ය පරිදි සිදුවන අතර, සැපයුම්කරුවන්ට නියමිත පරිදි මුදල් ගෙවන බව සමාගම තහවුරු කරයි.
සමාගමේ මූල්‍ය වාර්තා වලට අනුව, ජුනි 30 වන විට එහි මුළු ණය ප්‍රමාණය අමෙරිකානු ඩොලර් බිලියන 2.1ක් පමණ විය. 2022 වසරේදී විශේෂ අරමුණු අත්පත් කරගැනීමේ සමාගමක් (SPAC) හරහා ඩොලර් බිලියන 4.8ක වටිනාකමකින් යුතුව යළි කොටස් වෙළඳපොළට පිවිසි දින සිට, Getty සමාගමේ කොටස්වල වටිනාකම 99%කින් පමණ පහළ ගොස් තිබේ.
මේ හේතුවෙන් සැප්තැම්බර් මස අවසානයේදී නිව්යෝක් කොටස් හුවමාරුව (NYSE) විසින් සමාගම ලැයිස්තුවෙන් ඉවත් කිරීමේ (delisting) කටයුතු ද ආරම්භ කරන ලදී.
කෙසේ වෙතත්, Koch Equity Development වෙතින් ලැබෙන ඩොලර් මිලියන 143ක මූල්‍ය ආධාරය මෙම පුනර්ව්‍යුහගත කිරීමේ ක්‍රියාවලියට ශක්තියක් වනු ඇතැයි අපේක්ෂා කෙරේ.
