දිවයිනේ ප්‍රදේශ දෙකකදී සිදු වූ අනතුරුවලින් පුද්ගලයින් දෙදෙනෙකු ජීවිතක්ෂයට පත්ව තිබේ.
මිද්දෙණිය - පනාමුර මාර්ගයේ මුල්ඇඩියාවල හන්දිය ආසන්නයේදී සිදු වූ අනතුරකින් පුද්ගලයෙකු මියගොස් ඇත.
මිද්දෙණිය දෙසට ධාවනය වූ ත්‍රිරෝද රථයක් රියැදුරුට පාලනය කරගත නොහැකිව මාර්ගයේ පෙරළීයාමෙන් මෙම අනතුර සිදුව තිබේ.
අනතුරින් තුවාල ලැබූ ත්‍රීරෝද රථයේ රියැදුරු ඇඹිලිපිටිය රෝහලට ඇතුළත් කිරීමෙන් පසු මියගොස් ඇති බව පොලීසිය පැවසීය.
මෙලෙස මියගොස් ඇත්තේ මිද්දෙණිය ප්‍රදේශයේ පදිංචිව සිටි 30 හැවිරිදි අයෙකි.
පනාමුර පොලීසිය විසින් සිද්ධිය සම්බන්ධයෙන් වැඩිදුර විමර්ශන සිදු කරයි.
සෙට්ටිකුලම, මැදවච්චිය - මන්නාරම මාර්ගයේ කල්ලාරු පාලම ආසන්නයේදී සිදු වූ අනතුරකින් ද පුද්ගලයෙකු ජීවිතක්ෂයට පත්ව තිබේ.
මන්නාරම දෙසට ධාවනය වූ බස් රථයක් තවත් බස් රථයකට ඉස්සර කිරීමට යාමේදී ඊට ප්‍රතිවිරුද්ධ දෙසින් පැමිණි පාපැදියක ගැටීමෙන් මෙම අනතුර සිදුව ඇත.
අනතුරින් තුවාල ලැබූ පාපැදිකරු සෙට්ටිකුලම රෝහලට ඇතුළත් කර ප්‍රතිකාර ලබමින් සිටියදී මියගොස් ඇති බව පොලීසිය පැවසීය.
මෙලෙස මියගොස් ඇත්තේ වයස අවුරුදු 32ක් වූ සින්නතම්පනේ ප්‍රදේශයේ පදිංචිව සිටි අයෙකි.
අනතුරින් පසු බස් රථ රියැදුරු පලාගොස් ඇති අතර, සැකකරු අත්අඩංගුවට ගැනීම සඳහා සෙට්ටිකුලම පොලීසිය වැඩිදුර විමර්ශන සිදු කරයි.
