ජපානයේ පැවැත්වෙන ආසියානු ක්‍රීඩා උළෙලේ පිරිමි ක්‍රිකට් තරගයේ ලෝකඩ පදක්කම වෙනුවෙන් අද (03) පැවැත්වෙන තරගයේ පළමුවෙන් පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 20 අවසානයේ කඩුලු 9ක් දැවී ලකුණු 165ක් රැස්කිරීමට සමත් විය.
ඒ අනුව තරගයේ ජයග්‍රහණය සඳහා බංග්ලාදේශ කණ්ඩායමට ලකුණු 166ක ඉලක්කයක් හිමිව ඇත.
ශ්‍රී ලංකා ඉනිමේ පළමු පන්දුවාර 13 තුළදී තරගයේ සම්පූර්ණ පාලනය තමන් සතුව තබා ගැනීමට බංග්ලාදේශ පන්දු යවන්නන් සමත් වූ අතර, එම අවස්ථාව වනවිට ශ්‍රී ලංකා කණ්ඩායම ලකුණු 63කට කඩුලු 5ක් දැවී දැඩි පීඩනයකට ලක්ව සිටියේය.
ශ්‍රී ලංකා ඉනිමේ මුල් පෙළ පිතිකරුවන් අසාර්ථක වූ අතර, පිතිකරුවන් තිදෙනෙකු (අශේන් බණ්ඩාර 18) හැරෙන්නට වෙනත් කිසිදු අයෙකුට ලකුණු 6කට වඩා රැස්කිරීමට නොහැකි විය.
අත්‍යාවශ්‍යම අවස්ථාවේදී එක්වූ තරිඳු රත්නායක සහ නායක සහන් ආරච්චිගේ ප්‍රබල සටහනක නිරත වෙමින් පන්දු 46කදී ලකුණු 94ක විශිෂ්ට සබඳතාවක් ගොඩනැගීමට සමත් වූහ.
එහිදී වේගවත් ඉනිමක් ක්‍රීඩා කළ තරිඳු රත්නායක පන්දු 32කදී හයේ පහර 5ක් සහ හතරේ පහර 7ක් සමගින් ලකුණු 65ක් රැස්කළ අතර, නායකත්වයේ ඉනිමක් දියත් කළ සහන් ආරච්චිගේ පන්දු 37කදී ලකුණු 33ක් ලබා ගත්තේය.
මොවුන් දෙදෙනාගේ ප්‍රහාරාත්මක පිතිහරඹය හේතුවෙන් අවසන් පන්දුවාර 7 තුළදී පමණක් ලකුණු 102ක් රැස්කිරීමට ශ්‍රී ලංකාවට හැකි විය.
මෙම තරගාවලියේ පැවැති අවසන් පූර්ව තරගවලදී ශ්‍රී ලංකාව ඉන්දියාව හමුවේත්, බංග්ලාදේශය පාකිස්තානය හමුවේත් පරාජයට පත්වීම හේතුවෙන් දෙපිළටම මෙලෙස ලෝකඩ පදක්කම වෙනුවෙන් තරග කිරීමට සිදුවිය.
මේ අතර අවසන් පූර්ව තරග ජයගත් ඉන්දියාව සහ පාකිස්තානය අතර රන් පදක්කම සඳහා වන තරගය මෙරට වේලාවෙන් අද පෙ.ව. 10ට ආරම්භ වීමට නියමිතය.
