ජපානයේ අයිචි හා නගෝයා නගර කේන්ද්ර කරගනිමින් පැවැත්වෙන 20 වැනි ආසියානු ක්රීඩා උළෙලේ පළමු දින 7 (සැප්. 26) අවසානයේ රන් පදක්කම් 100 සීමාව පසුකිරීමට චීනය සමත්ව තිබේ.
සත්කාරක ජපානය ඇතුළු සියලු රටවලට ප්රබල අභියෝගයක් එල්ල කරමින් පදක්කම් සටහනේ පෙරමුණේ පසුවන චීනය, මේ වනවිට රන් පදක්කම් 105ක්, රිදී පදක්කම් 39ක් සහ ලෝකඩ පදක්කම් 26ක් සමගින් සමස්ත පදක්කම් 170ක් දිනා ගැනීමට සමත්ව ඇත.
පදක්කම් සටහනේ දෙවැනි ස්ථානය සත්කාරක ජපානයට හිමිව ඇත්තේ රන් 30ක්, රිදී 46ක් සහ ලෝකඩ 47ක් සමඟින් සමස්ත පදක්කම් 123ක් ලබා ගනිමිනි.
රන් පදක්කම් 14ක්, රිදී 20ක් සහ ලෝකඩ 36ක් ලබා සමස්ත පදක්කම් 70ක් දිනාගත් දකුණු කොරියාව තෙවැනි ස්ථානයේ පසුවේ.
දකුණු කොරියානුවන්ගේ ප්රබලම එදිරිවාදී රටවල උතුරු කොරියාවද රන් 5ක්, රිදී 5ක් හා ලෝකඩ 4ක් සමගින් පදකක්ම් 14ක් දිනා පදක්කම් සටහනේ 8වැනි ස්ථානය හිමිකරගෙන ඇත.
අසල්වැසි ඉන්දියාව රන් 3ක්, රිදී 11ක් සහ ලෝකඩ 13ක් ඇතුළුව පදක්කම් 27ක් ලබා 12 වැනි ස්ථානය තහවුරු කරගෙන තිබේ.
මෙතෙක් නිමාවූ තරග ඉසව් අනුව රටවල් 38ක් අවම වශයෙන් එක් පදක්කමක් හෝ දිනා ගැනීමට සමත්ව ඇත.
එහිදී කාන්තා ක්රිකට් කණ්ඩායම දිනාගත් රිදී පදක්කම පමණක් හිමිකරගෙන සිටින ශ්රී ලංකාව පදක්කම් සටහනේ 30 වැනි ස්ථානයේ පසුවෙයි.
මීට අමතරව පාකිස්තානය ලෝකඩ පදක්කම් 4ක් සමගන් 32 වැනි ස්ථානයේ පසුවන අතර, නේපාලය ලෝකඩ පදක්කම් 2ක්ද, බංග්ලාදේශය ලෝකඩ පදක්කමක්ද හිමිකරගෙන සිටී.
ඉකුත් 19 වැනිදා ආරම්භ වූ මෙම ආසියානු ක්රීඩා උළෙල එළඹෙන ඔක්තෝබර් 4 වැනිදා දක්වා පැවැත්වේ.
ආසියානු ඔලිම්පික් කවුන්සිලයට අයත් රටවල් සහ කලාප 45ක් මෙන්ම ප්රථම වරට එක්වූ ආසියානු සරණාගත කණ්ඩායම ද ඇතුළුව සමස්ත කණ්ඩායම් 46ක් මෙවර තරගාවලියට නියෝජනය වේ.
