ජපානයේ පැවැත්වෙන ආසියානු ක්රීඩා උළෙලේ මලල ක්රීඩා තේරීම් තරගවලදී මීටර 100 පිරිමි ධාවන ඉසව්වේ සිව්වැනි හොඳම කාලය වාර්තා කළ සුපුන් හංසජ ක්රීඩකයාගේ නම ඉවත්කරමින්, පස්වැනි හොඳම කාලය වාර්තා කළ ක්රීඩකයා ආසියානු ක්රීඩා උළෙලට නම්කර ඇති බවට චෝදනා එල්ල වී තිබේ.
සුපුන් හංසජ අතිරේක ක්රීඩකයෙකු ලෙස හෝ නම් කිරීමට මලල ක්රීඩා බලධාරීන් පියවර නොගැනීමෙන්, ආසියානු ක්රීඩා උලෙළේ මීටර 100x4 ධාවන ඉසව්වට ශ්රී ලංකා සහභාගිත්වයද අවිනිශ්චිත වී ඇත. ඒ සඳහා නම් කළ ක්රීඩකයෙකු ආබාධයකට ලක්වීම හේතුවෙන්ය.
මෙවර ජපානයේ පැවැත්වෙන ආසියානු ක්රීඩා උලෙළේ පිරිමි මීටර 100x4 සහාය දිවීමේ ධාවන ඉසව්ව සඳහා ශ්රී ලංකාව නියෝජනය කරමින් මෑතකදී එම ඉසව්වේ ශ්රී ලංකා වාර්තාව තැබූ චමෝද් යෝධසිංහ ප්රමුඛ ක්රීඩකයින් සිවුදෙනෙකුගෙන් යුත් කණ්ඩායමක් සහභාගිවීමට නියමිතව ඇත.
කෙසේ වෙතත් ඉන් එක් ක්රීඩකයෙක් ආබාධයකට ලක්වීම හේතුවෙන් ශ්රී ලංකා කණ්ඩායම එම ඉසව්වට සහභාගි වීම අවිනිශ්චිත වී තිබේ.
ඒ එම ඉසව්ව සඳහා අතිරේක ක්රීඩයෙකු නම් කිරීමට මලල ක්රීඩා බලධාරීන් අපොහොසත්වීම හේතුවෙන්ය.
'අද දෙරණ'ට වාර්තා වූයේ ඒ වෙනුවට මීටර 110 කඩුලු පැනීමේ ක්රීඩකයෙකු හෝ මීටර 400 හතර සහාය දිවීමේ ඉසව්වට එක්වන ක්රීඩකයෙකු ආදේශ කිරීමට මලල ක්රීඩා බලධාරීන් සූදානම් වන බවය.
කෙසේ වෙතත් සුවිශේෂීම කරුණ වන්නේ සහය දිවීමේ ඉසව්ව සඳහා ජපානය බලා පිටත්ව ගිය ශ්රී ලංකා කණ්ඩායමේ එක් ක්රීඩකයෙක්ට වඩා හොඳ කාලයක් වාර්තා කර ඇති සුපුන් හංසජ, අතිරේක ක්රීඩකයෙකු ලෙස හෝ නම් කර නොතිබීමය.
මෙරට ක්රීඩා බලධාරීන්ගේ වරදින් ක්රීඩක ක්රීඩිකාවන්ට වන්දි ගෙවීමට සිදු වූ පළමු අවස්ථාව මෙය නොවේ.
අනාගතයේදීත් මෙවන් කනගාටුදායක සිදුවීම් සිදුවුවහොත් ක්රීඩක ක්රීඩිකාවන්ට, ක්රීඩාව එපා වී ක්රීඩාවෙන් ඈත් වීම වැළැක්විය නොහැකිවනු ඇත.
