ගම්පහ, ඉඹුල්ගොඩ, රාජසිංහ මාවතේ කුලී නිවසක පවත්වාගෙන ගිය මහා පරිමාණ ව්යාජ උපාධි සහතික, ලිපි ලේඛන සහ නිල මුද්රා මුද්රණය කරන ස්ථානයක් වටලා පුද්ගලයෙකු අත්අඩංගුවට ගෙන තිබේ.
ගම්පහ පොලිස් බුද්ධි කොට්ඨාසයට ලැබුණු තොරතුරකට අනුව උපාය දූතයන් යොදා සිදුකළ අනාවරණයකින් අනතුරුව, ඒ පිළිබඳව යක්කල පොලිස් ස්ථානාධිපතිවරයා දැනුවත් කර මෙම වැටළීම සිදු කර ඇත.
සැකකරු වයස අවුරුදු 27ක් වන තංගල්ලේ පදිංචිකරුවෙකි.
මසකට රුපියල් 35,000ක කුලියට ගත් නිවසක මෙම ජාවාරම පවත්වාගෙන ගොස් ඇත.
එහිදී ලැප්ටොප් පරිගණක 2ක්, ස්මාර්ට් දුරකථන 2ක්, වර්ණ මුද්රණ යන්ත්රයක්, ව්යාජ සහතික පත් 35ක්, ආයතන ප්රධානීන්ගේ නිල මුද්රා 51ක් සහ එම්බොස් සීල් 3ක් පොලිස් භාරයට ගෙන තිබේ.
විශ්වවිද්යාල, රජයේ සහ පෞද්ගලික ආයතන මෙන්ම බැංකු ඇතුළු විවිධ ක්ෂේත්රවල ප්රධානීන්ගේ නිල මුද්රා සහ ලිපි ශීර්ෂ මෙම ස්ථානයේ සකස් කර තිබේ.
ඒ අතරට දේශීය ආදායම් දෙපාර්තමේන්තුව, ශ්රී ලංකා විභාග දෙපාර්තමේන්තුව, පෞද්ගලික බැංකුවක සහ පේරාදෙණිය, ශ්රී ජයවර්ධනපුර, කැලණිය, මොරටුව, රුහුණු, රජරට, වයඹ, ඌව වෙල්ලස්ස ඇතුළු රජයේ සහ පෞද්ගලික විශ්වවිද්යාල රැසක නිල මුද්රා ඇතුළත් වේ.
වසරක පමණ කාලයක සිට මෙම ජාවාරම කරගෙන ගොස් ඇති අතර, සැකකරු විසින් සාමාන්ය සහතික පත් රුපියල් 25,000ත් 50,000ත් අතර මුදලකට අලෙවි කර තිබේ.
කෙසේ වෙතත්, ජපානය වැනි විදෙස් රටවල් සඳහා අවශ්ය කරන ව්යාජ සහතික පත් රුපියල් ලක්ෂ හතරක මුදලකට සකස් කර දී ඇති බව අනාවරණය කරගෙන ඇත.
මෙලෙස සකස් කරන ලද ව්යාජ ලේඛන මඟින් පුද්ගලයින් 200ක පමණ පිරිසක් විදෙස්ගත වී ඇති බවට සැකකරු ප්රකාශ කර තිබේ.
යක්කල පොලීසිය විසින් මේ පිළිබඳ වැඩිදුර විමර්ශන සිදුකරනු ලබන අතර, සැකකරු අධිකරණයට ඉදිරිපත් කිරීමට නියමිතය.
