ජාතික තැඹිලි ගම්මාන 250ක් ස්ථාපිත කිරීමේ ජාතික වැඩසටහනට සමගාමීව බදුල්ල දිස්ත්‍රික් තැඹිලි ගම්මාන ස්ථාපිත කිරීමේ සමාරම්භ උත්සවය අද (18) පස්සර, තොලබෝවත්ත ප්‍රදේශයේදී සිදු කෙරිණි.

දිවයින පුරා තැඹිලි ගම්මාන 250ක් ස්ථාපිත කිරීමේ ජාතික වැඩසටහනේ පළමු අදියර පසුගිය 02 වැනි දින ආරම්භ වූ අතර ඊට සමගාමීව බදුල්ල දිස්ත්‍රික් වැඩසටහන මෙලෙස ආරම්භ කෙරිණි.

මෙහිදී සංකේතාත්මකව තැඹිලි වගාකරුවන් හට තැඹිලි පැළ 500ක් බෙදා හැරීම සිදුකළ අතර පොල් ඉඩම් පුනරුත්ථාපන වැඩසහන යටතේ ප්‍රතිලාභීන් සඳහා චෙක්පත් ප්‍රදානය කිරීමද සිදුවිය.

මෙම වැඩසටහනේ ප්‍රධාන අරමුණ වන්නේ 2030 වර්ෂය වන විට මෙරට වාර්ෂික තැඹිලි අස්වැන්න ගෙඩි මිලියන 25කින් ඉහළ නැංවීම මෙන්ම තැඹිලි සහ ඒ ආශ්‍රිත නිෂ්පාදනවල අපනයන ආදායම අමෙරිකානු ඩොලර් මිලියන 12කට වඩා වැඩි අගයකින් ව්‍යාප්ත කිරීම වේ.

ඒ අනුව 2026-2028 කාලසීමාව තුළදී නව තැඹිලි වගා ව්‍යාපෘතිය සඳහා තැඹිලි පැළ 221,500ක් රෝපණය කිරීමටත් දැනට පවතින තැඹිලි වගාවන් හී ගස් 221,500ක් පුනරුත්ථාපනය කිරීමත් මෙමගින් සැලසුම් කර ඇත.

එමෙන්ම නව වගා බිම් ප්‍රමාණය පුළුල් කිරීම මෙන්ම පවතින තැඹිලි ගස්වල ඵලදායීතාව ඉහළ නැංවීම තුළින් තැඹිලි නිෂ්පාදනයේ ප්‍රමාණය සහ ගුණාත්මකභාවය වැඩිදියුණු කිරීමද මෙමගින් අපේක්ෂා කර තිබේ.

තවද තැඹිලි වගාවේ ඵලදායීතාව සහ අස්වැන්නේ ස්ථාවරභාවය තහවුරු කිරීම සඳහා තැඹිලි වගා භූමි අක්කර 500ක් ආවරණය වන පරිදි ජල සම්පාදන පද්ධති ඉදිකිරීමටද මෙම වැඩසටහන යටතේ සැලසුම් කර ඇත.

විධිමත් ජල කළමනාකරණ ක්‍රමවේදයක් ක්‍රියාත්මක කිරීම තුළින් වියළි කාලසීමාවලදී වගාවන් ආරක්ෂා කර ගනිමින් ස්ථාවර හා ගුණාත්මක අස්වැන්නක් ලබාගැනීමට අවශ්‍ය පසුබිම සකස් කිරීම ද මෙහි අරමුණ වේ.

තවද, තැඹිලි වගාව ස්ථාපිත කිරීමේ අදියරේ සිට අස්වැන්න නෙළීම, ප්‍රවාහනය, සැකසීම සහ අපනයනය දක්වා වූ සමස්ත වටිනාකම් දාමය විධිමත්ව කළමනාකරණය කිරීම සඳහා වගාකරුවන්, තැඹිලි එකතුකරන්නන් සහ අපනයනකරුවන් ඇතුළු සියලු පාර්ශ්වකරුවන් සම්බන්ධ කෙරෙන නව විධිමත් දත්ත පද්ධතියක් ද ස්ථාපිත කිරීමට නියමිතය.

මෙම බදුල්ල දිස්ත්‍රික් සමාරම්භක වැඩසටහන සඳහා වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න, ඌව පළාත් ආණ්ඩුකාර කපිල ජයසේකර, වෙළඳ, වාණිජ සහ ආහාර සුරක්ෂිතතා නියෝජ්‍ය අමාත්‍ය ආර්.එම්. ජයවර්ධන, පාර්ලිමේන්තු මන්ත්‍රී කිට්නන් සෙල්වරාජ් යන මහත්වරුන් සහ පස්සර ප්‍රාදේශීය සභාවේ සභාපති පියසේන මහතා ඇතුළු දේශපාලන නියෝජිතයින් එක්ව සිටියහ.

ඊට අමතරව ඌව පළාත් ලේකම් අනුෂා ගෝකුල මහත්මිය, බදුල්ල අතිරේක දිස්ත්‍රික් ලේකම්තුමිය, පස්සර ප්‍රාදේශීය ලේකම්, පොල් වගා කිරීමේ මණ්ඩලයේ සභාපති වෛද්‍ය සුනිමල් ජයකොඩි මහතා ඇතුළු රාජ්‍ය නිලධාරීන් සහ ප්‍රදේශයේ ජනතාව විශාල පිරිසක් සහභාගී විය.