දිට්වා සුළි කුණාටුවට මුහුණ දීම සඳහා පූර්ව සූදානමක් නොමැති වීම සම්බන්ධයෙන් පූර්ණ අධ්යයනයක් සිදු කර වාර්තා කිරීමටත්, ඒ පිළිබඳ යෝජනා සහ නිර්දේශ පාර්ලිමේන්තුවට ඉදිරිපත් කිරීමටත් වන පාර්ලිමේන්තු විශේෂ කාරක සභාව විසින් මෙම ආපදා අවස්ථාවේදී පළාත් පාලන ආයතනවල සම්බන්ධීකරණය සිදු වූ ආකාරය විමසා බැලීම සඳහා ප්රාදේශීය සභා සහ නගර සභා නියෝජිතයන් කාරක සභාවට කැඳවීමට තීරණය කර තිබේ.
විශේෂයෙන්, ආපදා අවස්ථාවේදී ප්රාදේශීය සභා සහ නගර සභා ඇතුළු පළාත් පාලන ආයතන නිල සන්නිවේදන හා සම්බන්ධීකරණ ක්රියාවලියට සම්බන්ධ වූ ආකාරය පිළිබඳව වැඩිදුර විමර්ශනය කිරීමේ අවශ්යතාව කාරක සභා සාමාජිකයින් මෙහිදී පෙන්වා දුන්හ.
අමාත්ය වෛද්ය නලින්ද ජයතිස්ස මහතාගේ සභාපතිත්වයෙන් පාර්ලිමේන්තුවේදී පසුගිය 10 වැනිදා රැස් වූ කාරක සභාවේදී, මහනුවර සහ මාතලේ දිස්ත්රික්කවල ආපදා කළමනාකරණ ක්රියාවලිය පිළිබඳව ව්යසන කළමනාකරණය සඳහා වූ ජාතික සභාවේ සාමාජිකයින් සහ මහනුවර, මාතලේ දිස්ත්රික් ලේකම්වරුන්ගෙන් කරුණු විමසා බැලීය.
ඒ අනුව, 2025 නොවැම්බර් මස 23 සිට 27 දක්වා කාලය තුළ මෙම ප්රදේශවල ඇති වූ අධික වර්ෂාපතනය, නායයෑම් සහ ගංවතුර තත්ත්වයන් හමුවේ පූර්ව අනතුරු ඇඟවීම්, රාජ්ය ආයතන අතර සන්නිවේදනය සහ හදිසි ප්රතිචාර ක්රියාවලිය පිළිබඳව මෙහිදී කාරක සභාවේ අවධානය යොමු විය.
එමෙන්ම, හදිසි ආපදා අවස්ථාවලදී අනුගමනය කළ යුතු විධිමත් ලිඛිත ක්රියා පටිපාටි සකස් කිරීම, ආපදා පෙරහුරු නිතිපතා පැවැත්වීම සහ පූර්ව අනතුරු ඇඟවීමේ පද්ධති තවදුරටත් කාර්යක්ෂම කිරීමේ අවශ්යතාව පිළිබඳව ද සාකච්ඡා කෙරිණි.
මෙම රැස්වීම සඳහා කාරක සභා සාමාජික නියෝජ්ය අමාත්යවරුන් වන මේජර් ජනරාල් (විශ්රාමික) අරුණ ජයසේකර සහ ඇන්ටන් ජයකොඩි යන මහත්වරුන් ද, පාර්ලිමේන්තු මන්ත්රීවරුන් වන නීතිඥ අනුරාධ ජයරත්න, රෝහිණී කුමාරි විජේරත්න, කන්දසාමි ප්රභු, රුවන් මාපලගම සහ වෛද්ය පත්මනාදන් සත්යලිංගම් යන මහත්ම මහත්මීහු ද සහභාගි වූහ.
