බන්ධනාගාර නිලධාරීන්ගේ වැටුප් හා දීමනා ඉහළ නැංවීම සම්බන්ධයෙන් ඉදිරි අයවැයේදී අවධානය යොමු කර ඇති බව අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා පවසයි.
අමාත්යවරයා මේ බව සඳහන් කළේ දුම්බර බෝගම්බර බන්ධනාගාරය සහ පල්ලේකැලේ එළිමහන් බන්ධනාගාරය මූලික කර ගනිමින් ඒකාබද්ධ යාන්ත්රණයක් ස්ථාපිත කිරීමෙන් අනතුරුව, දුම්බර බන්ධනාගාරයේ නිලධාරීන් මුහුණ දෙන ගැටලු සම්බන්ධයෙන් පැවති සාකච්ඡාවකට එක්වෙමින්ය.
මීගමුව බන්ධනාගාරය තුළ ඇති වූ ගැටුම්කාරී තත්ත්වයෙන් මියගිය බන්ධනාගාර නිලධාරීන් වෙනුවෙන් ඔවුන්ගේ ඥාතීන් වෙත වන්දි ලබාදීමට අවශ්ය පියවර ගෙන ඇති බවද අමාත්යවරයා සඳහන් කළේය.
බන්ධනාගාර නිලධාරීන්ගේ වැටුප් හා දීමනා ඉහළ නැංවීම සම්බන්ධයෙන් ඉල්ලීම් බන්ධනාගාර කොමසාරිස් ජනරාල්වරයා හරහා ලැබී ඇති බවත්, නිලධාරීන් විසින් සිදුකරන විශිෂ්ට සේවය වෙනුවෙන් ඔවුන්ගේ වැටුප් හා දීමනා ඉහළ නැංවිය යුතු බවත් අමාත්යවරයා පැවසීය.
“ඉදිරි අයවැයෙන් බන්ධනාගාර නිලධාරීන්ට දීමනාවක් ලබාදීම සම්බන්ධයෙන් ජනාධිපතිතුමා සමඟ සාකච්ඡා කළා,” යැයිද අමාත්යවරයා සඳහන් කළේය.
බන්ධනාගාර දෙපාර්තමේන්තුව තුළ විශාල නිලධාරී පුරප්පාඩු සංඛ්යාවක් පවතින බව පෙන්වා දුන් අමාත්යවරයා, බන්ධනාගාර නිලධාරීන්ගේ සේවය මුදලින් තක්සේරු කළ නොහැකි බවද අවධාරණය කළේය.
බන්ධනාගාර තදබදය අවම කිරීම සඳහා සියලු පියවර ගනිමින් සිටින බවත්, ලබන වසරේ ජනවාරි 31 වනදා වන විට රස පරීක්ෂක වාර්තා ප්රමාදවීම හේතුවෙන් මාස තුනකට වැඩි කාලයක් රිමාන්ඩ් බන්ධනාගාරගතව සිටීමට සිදුවන තත්ත්වය වැළැක්වීම සඳහා වැඩපිළිවෙළක් සකස් කර ඇති බවත් අමාත්යවරයා පැවසීය.
මත්ද්රව්යවලට ඇබ්බැහි වූ පුද්ගලයන් සම්බන්ධයෙන් පුනරුත්ථාපන ප්රවේශයක් අනුගමනය කළද, මත්ද්රව්ය අලෙවි කරන්නන් සම්බන්ධයෙන් කිසිදු සහනයක් ලබා නොදෙන බවද ඔහු සඳහන් කළේය.
“මත්ද්රව්ය සැපයුම නවතා දැමීමට අපට හැකියාව තිබෙනවා. නමුත් ඉල්ලුම නතර කිරීමට නම් සමාජයේ සහාය අවශ්යයි,” යැයි අමාත්යවරයා පැවසීය.
ආර්ථික ගැටලු පැවතිය හැකි නමුත් සමාජ විරෝධී ක්රියාවන්ට යොමුවීමෙන් වළකින ලෙසද අමාත්යවරයා ඉල්ලා සිටියේය.
බන්ධනාගාර සේවය ගෞරවනීය වෘත්තියක් බැවින් එහි ගරුත්වය ආරක්ෂා කරමින් කටයුතු කිරීම බන්ධනාගාර නිලධාරීන්ගේ වගකීමක් බවද අමාත්යවරයා අවධාරණය කළේය. කිසියම් ප්රතිලාභයක් වෙනුවෙන් තවත් පුද්ගලයකුගේ ජීවිතයක් විනාශ නොකළ යුතු බවද ඔහු සඳහන් කළේය.
නඩු කටයුතු සඳහා රැඳවියන් රැගෙන යාමේදී නිලධාරීන් මුහුණ දෙන ගැටලු, රැඳවියන්ගේ සහ නිලධාරීන්ගේ සුබසාධන ගැටලු ඇතුළු කරුණු රැසක් සම්බන්ධයෙන්ද මෙහිදී සාකච්ඡා කෙරිණි.
අමාත්යවරයා බන්ධනාගාරයේ පවතින තත්ත්වය පිළිබඳව නිරීක්ෂණයකද නිරත වූ අතර, එහිදී රැඳවියන් මුහුණ දී ඇති ගැටලු සම්බන්ධයෙන් ඔවුන් සමඟ සාකච්ඡා කළේය.
බන්ධනාගාර තුළ ගැටුම්කාරී තත්ත්වයක් ඇතිවුවහොත් කඩිනමින් ප්රතිචාර දැක්වීම සහ රැඳවියන්ගේ සුබසාධන කටයුතු විධිමත් කිරීමේ අරමුණින් සියලු බන්ධනාගාර මූලික කර ගනිමින් ඒකාබද්ධ යාන්ත්රණ ස්ථාපිත කිරීමට පියවර ගෙන තිබේ.
