ආසියානු ක්රිකට් සභාපති මොහ්සින් නක්විගෙන් ජයග්රාහී කුසලානය භාර නොගැනීමට ඉන්දීය කාන්තා ක්රිකට් කණ්ඩායම ඊයේ (13) තීරණය කළ අතර, එම ස්ථාවරය සම්බන්ධයෙන් තමන් තරගාවලියට පෙර සිටම ආසියානු ක්රිකට් කවුන්සිලයට දැනුම්දී තිබූ බව ඉන්දීය ක්රිකට් පාලක මණ්ඩලය පවසා තිබේ.
ඩුබායි හිදී පැවැති අවසන් මහා තරගයේදී ශ්රී ලංකාව ලකුණු 72කින් පරාජය කර ඉන්දියාව සිය 8 වන ආසියානු කුසලාන ශූරතාව දිනාගත් නමුත්, ත්යාග ප්රදානෝත්සවයේදී නක්විගෙන් කුසලානය ලබාගැනීමට ඉන්දීය නායිකා හර්මන්ප්රීට් කවුර් ඇතුළු කණ්ඩායම ප්රතික්ෂේප කළේය.
තරගය අවසන්වීමෙන් පසු ත්යාග ප්රදානෝත්සවය ආරම්භවීමට විනාඩි 40ක පමණ දීර්ඝ කාලයක් ගතවූ අතර, එහිදී ශ්රී ලංකා කණ්ඩායමට හිමි අනුශූරතා චෙක්පත නක්වි විසින් ශ්රී ලංකා නායිකා චමරි අතපත්තු වෙත පිරිනමන ලදී.
කෙසේ වෙතත් ඉන්දීය කණ්ඩායම වෙත ශූරතා පදක්කම් හෝ කුසලානය පිරිනමන අයුරු සජීවී විකාශය ඔස්සේද පෙන්වීම නවත්වා දැමුණි.
එය ඉන්දීය ක්රිකට් පාලක මණ්ඩලයේ තීරණයක් බවත්, කණ්ඩායමක් ලෙස තමන් එම තීරණය වෙනුවෙන් පෙනී සිටින බවත් ඉන්දීය ප්රධාන පුහුණුකරු අමෝල් මුසුම්දාර් පවසයි.
මෙම සිදුවීම පසුගිය වසරේ සැප්තැම්බර් මාසයේදී පැවැති පිරිමි ආසියානු කුසලාන තරගාවලියේ අවසන් මහා තරගයේ සිදුවීමට සමාන එකකි.
එහිදීද පාකිස්තානය පරාජය කරමින් ශූරතාව දිනූ ඉන්දීය පිරිමි කණ්ඩායම, පාකිස්තාන අභ්යන්තර කටයුතු අමාත්යවරයා මෙන්ම එරට ක්රිකට් සභාපතිවරයා ද වන මොහ්සින් නක්විගෙන් කුසලානය ලබාගැනීම ප්රතික්ෂේප කළේය.
දෙරට අතර පැවැති දේශපාලනික හා ආරක්ෂක තත්ත්වයන් මත ඉන්දීය ක්රීඩකයන් එම පියවර ගත් අතර, ඒ හේතුවෙන් කුසලානය නොමැතිව ජයග්රහණය සැමරීමට එවකට ඉන්දීය කණ්ඩායම කටයුතු කළේය.
ඒ අනුව මෙවර ඉන්දීය කාන්තා කාණ්ඩායමද ශූරතා කුසලානය නොමැති යළි ඉන්දියාව බලා නික්ම යනු ඇත.
