තරුණ කටයුතු සහ ක්රීඩා අමාත්යාංශය, ක්රීඩා සංවර්ධන දෙපාර්තමේන්තුව 50 වන ජාතික ක්රීඩා උළෙලට සමගාමීව සංවිධානය කරන 'කොළඹ මැරතන්' ජාත්යන්තර තරගය සඳහා තරගකරුවන් 5,000කට වැඩි පිරිසක් මේ වනවිට ලියාපදිංචි වී ඇත.
ඉන් ප්රධාන තරග ඉසව් සඳහා පමණක් 1,200කට අධික ක්රීඩක ක්රීඩිකාවන් පිරිසක් ලියාපදිංචි වී සිටින අතර, ඉන් තරගකරුවන් 405ක්ම ලියාපදිංචි වී ඇත්තේ පූර්ණ මැරතන් ඉසව්වටය.
ඊට අමතරව අර්ධ මැරතන් ඉසව්වට 398ක් සහ කිලෝමීටර් 10 ඉසව්වට 389ක් ලෙස තරගවැදීමට නියමිතය.
ශ්රී ලාංකේය ක්රීඩකයන්ට අමතරව කෙන්යාව, ඉතියෝපියාව ඇතුළු විදේශ රටවල් 25ක් නියෝජනය කරමින් විදේශීය ධාවකයන් 130කට වැඩි පිරිසක් මෙවර තරගාවලියට එක්ව සිටිති.
කිලෝමීටර් 5 විනෝදාත්මක තරගය (Fun Run) සඳහා තරගකරුවන් 4,000කට වැඩි පිරිසක් සහභාගීවීමට නියමිතව ඇත.
මෙම තරගය එළැඹෙන සැප්තැම්බර් 13 වනදා කොළඹ ගාලු මුවදොර පරිශ්රයේදී පැවැත්වේ.
ධාවන මාර්ග සැලසුම -
පූර්ණ මැරතන් තරගය (42KM)-
ගාලු මුවදොරින් ආරම්භ වී කොල්ලුපිටිය හන්දිය, මැරීන් ඩ්රයිව් ඔස්සේ දෙහිවල හන්දිය දක්වා ගොස් නැවත හැරී කොල්ලුපිටිය හන්දිය, පිත්තල හන්දිය, පෙරහැර මාවත, ගුවන් පාලම මතින් බාලදක්ෂ මාවත ඔස්සේ ගාලු මුවදොර වෙත පැමිණෙන වට 2කින් සමන්විතය.
අර්ධ මැරතන් තරගය (21KM) -
පූර්ණ මැරතන් ධාවන මාර්ගයම අනුගමනය කරමින් එක් වටයකින් තරගය නිමවේ.
කිලෝමීටර් 10 -
ගාලු මුවදොරින් ආරම්භ වී කොල්ලුපිටිය හන්දිය, මැරීන් ඩ්රයිව් ඔස්සේ බම්බලපිටිය දක්වා ගොස් නැවත කොල්ලුපිටිය හන්දිය, පිත්තල හන්දිය, පෙරහැර මාවත, ගුවන් පාලම මතින් බාලදක්ෂ මාවත ඔස්සේ ගාලු මුවදොරට පැමිණේ.
කිලෝමීටර් 5 විනෝදාත්මක තරගය (Fun Run) -
ගාලු මුවදොරින් ආරම්භ වී කොල්ලුපිටිය හන්දිය ලිබර්ටි සිනමාහල අසලින් හැරී අරලියගහ මන්දිරය මැද පාර, පෙරහැර මාවත, ගුවන් පාලම මතින් බාලදක්ෂ මාවත ඔස්සේ ගාලු මුවදොරින් නිමාවේ.
