ප්රවාහන, මහමාර්ග හා නාගරික සංවර්ධන අමාත්යාංශයේ රුපියල් මිලියන 401ක පිරිවැයකින් ඉදිවන මග්ගොන, ඉදිරිල්ලගොඩ දුම්රිය පාලමේ නැවත ඉදිකිරීම් කටයුතු ප්රවාහන හා මහමාර්ග නියෝජ්ය අමාත්ය ප්රසන්න ගුණසේන මහතාගේ ප්රධානත්වයෙන් ආරම්භ විය.
මුහුදුබඩ දුම්රිය මාර්ගයේ බේරුවල සහ මග්ගොන යන දුම්රිය ස්ථාන අතර සැතපුම් 33, දම්වැලු 43 ස්ථානයේ පිහිටි මෙම ඉදිරිල්ලගොඩ ද්විත්ව පාලම වසර ගණනාවක් තිස්සේ දැඩි ලෙස අබලන් වී තිබිණි.
පැරණි පාලමේ පවතින අබලන් තත්ත්වය සහ පසුව යොදවන ලද තාවකාලික පාලම හේතුවෙන් එම ස්ථානයෙන් ගමන් ගන්නා දුම්රියන්ගේ වේගය සීමා කිරීමට සිදු වූ අතර, එය මන්දගාමී දුම්රිය ධාවනයට ද හේතු විය.
මේ පිළිබඳව ලද ජනතා දැනුවත්කිරීම් සැලකිල්ලට ගනිමින්, වර්තමාන රජයේ ප්රවාහන හා මහමාර්ග නියෝජ්ය අමාත්ය ප්රසන්න ගුණසේන මහතාගේ උපදෙස් පරිදි මෙම ස්ථානයේ නව ද්විත්ව දුම්රිය පාලමක් ලෙස නැවත ඉදිකිරීම් ආරම්භ කිරීමට පියවර ගෙන ඇත.
මෙම අවස්ථාවට එක්වෙමින් නියෝජ්ය අමාත්ය ප්රසන්න ගුණසේන මහතා සඳහන් කළේ මෙරට දුම්රිය මගීන්ගේ ගමන් පහසුව තහවුරු කිරීම සඳහා අවශ්ය කෙරෙන දුම්රිය පාලම් 7ක් ඉදිරි කාලයේදී ඉක්මනින්ම ඉදිකිරීමට කටයුතු යොදා ඇති බවයි.
එසේම දුම්රිය දෙපාර්තමේන්තුවේ පවතින ගැටලු පිළිබඳව රජය නිරන්තරයෙන් සොයා බලන බැවින් ඒ පිළිබඳව වෘත්තීය සමිති ද අවබෝධයෙන් කටයුතු කළ යුතු බව හෙතෙම වැඩිදුරටත් පැවසීය.
