2027 වසරේ පළමුවරට පැවැත්වීමට නියමිත විස්සයි20 කාන්තා ශූරයන්ගේ කුසලාන ක්රිකට් තරගාවලියේ සත්කාරකත්වය ශ්රී ලංකාවෙන් ඉවත් කර ඉන්දියාවට ලබා දීමට තීරණය කර ඇති බව වාර්තා වේ.
ශ්රී ලංකා රජය විසින් පත් කරන ලද පරිවර්තන ක්රිකට් කමිටුව හරහා ශ්රී ලංකා ක්රිකට් ආයතනය පාලනය කිරීමට උත්සාහ කිරීම මීට ප්රධාන හේතුව වී තිබේ.
දේශපාලනිකව පත් කරන ලද පාලක මණ්ඩල ජාත්යන්තර ක්රිකට් කවුන්සිලය (ICC) විසින් පිළිනොගන්නා අතර, මෙම පරිවර්තන කමිටුව ස්ථාපිත කිරීමෙන් පසුව ශ්රී ලංකා ක්රිකට් නියෝජිතයන් ICC මණ්ඩල රැස්වීම්වලට සහභාගී වී නොමැත.
2026 පිරිමි T20 ලෝක කුසලාන තරගාවලියේ සම සත්කාරකත්වය දැරීමෙන් පසුව, වසරක් ඇතුළත ශ්රී ලංකාවේ පැවැත්වීමට නියමිතව තිබූ දෙවන ICC ඉසව්ව මෙයයි.
ඒ අනුව මෙම තීරණය හේතුවෙන් තරගාවලියේ සත්කාරක අයිතිය ශ්රී ලංකාවට අහිමි වී යනු ඇත.
එසේම මෙය වසර 3ක් ඇතුළත දේශපාලන මැදිහත්වීම් හේතුවෙන් ශ්රී ලංකාවට ICC තරගාවලියක සත්කාරකත්වය අහිමි වූ දෙවන අවස්ථාව වෙයි.
මීට පෙර 19න් පහළ පිරිමි ලෝක කුසලාන තරගාවලියේ සත්කාරකත්වය ද ශ්රී ලංකාවෙන් ඉවත් කර දකුණු අප්රිකාවට ලබාදීමට ICC පියවර ගත්තේය.
කෙසේ වෙතත් සත්කාරක රට පිළිබඳ අවසන් තීරණය ලබන ඔක්තෝබර් මාසයේ පැවැත්වෙන ඊළඟ ICC මණ්ඩල රැස්වීමේදී ප්රකාශයට පත් කිරීමට නියමිතය.
මෙම තරගාවලිය සඳහා කණ්ඩායම් 6ක් තරග වදින අතර, ඊට සත්කාරක රට ඇතුළුව ICC T20 ශ්රේණිගත කිරීම්වල මුල් ස්ථාන 5 හි කණ්ඩායම් ඇතුළත්ව ඇත.
ශ්රී ලංකා කාන්තා ක්රිකට් කණ්ඩායම මේ වනවිට T20 ශ්රේණිගත කිරීම්වල 7 වැනි ස්ථානයේ පසුවෙයි.
එම නිසා තරගාවලියේ සත්කාරකත්වය වෙනත් රටකට හිමි වුවහොත්, ශ්රී ලංකා කාන්තා කණ්ඩායමට මෙම තරගාවලිය සඳහා සුදුසුකම් ලැබීමේ අවස්ථාව ද අහිමි වී යාමේ දැඩි අවදානමක් මතුව තිබේ.
