කොළඹ SSC ක්රීඩාංගණයේදී ඉන්දියාවට එරෙහිව පැවැත්වෙන දෙවන ටෙස්ට් ක්රිකට් තරගයේ දෙවන ඉනිමේදී ද අගනා ශතකයක් රැස්කිරීමට සොනාල් දිනූෂ අද (27) සමත් විය.
පන්දු 196කදී හතරේ පහර 6ක් සමගින් ගොඩනැගූ මෙම විශිෂ්ට ඉනිම ද සමගින්, තරගයේ ඉනිම් දෙකෙහිදීම ශතක රැස්කළ පිතිකරුවන් අතරට එක්වීමට ඔහුට හැකි විය.
සොනාල් පළමු ඉනිමේදී පන්දු 162කට මුහුණදෙමින් ලකුණු 103ක් රැස්කිරීමට සමත්විය.
තමන් නියෝජනය කරන කණ්ඩායම පළමු ඉනිමේදී ප්රතිවාදීන්ට වඩා පිටුපසින් සිටි තරගයක ඉනිම් දෙකෙහිම ශතක රැස්කළ ලොව තෙවැනි පිතිකරුවා ලෙස සොනාල් මෙහිදී වාර්තා අතරට එක්විය.
මීට පෙර 1948 වසරේදී ඔස්ට්රේලියාවට එරෙහිව ඉන්දියාවේ විජේ හසාරේ ද, 2001 වසරේදී දකුණු අප්රිකාවට එරෙහිව සිම්බාබ්වේ හි ඇන්ඩි ෆ්ලවර් ද මෙම දස්කම දක්වා තිබුණි.
ඒ අනුව සොනාල් මෙම වාර්තාව අලුත් කළේ වසර 25කට පසුව වීම විශේෂත්වයකි.
ටෙස්ට් ක්රිකට් ඉතිහාසයේ ඉනිම් දෙකෙහිම ශතක ලබාගත් 101 වැනි පිතිකරුවා ලෙසත්, එම දස්කම දැක්වූ 8 වැනි ශ්රී ලාංකික පිතිකරුවා ලෙසත් වාර්තා අතරට එක්වීමට සොනාල්ට හැකිව තිබේ.
ලොව පළමු වරට 1909 වසරේදී ඔස්ට්රේලියාවේ වොරන් බාඩ්ස්ලි එංගලන්තයට එරෙහිව මෙම වාර්තාව තබා ඇත.
1982 වසරේදී ඉන්දියාවට එරෙහිව ඉනිම් දෙකේදී ශතක ලබමින් මෙම දස්කම දැක්වූ පළමු ශ්රී ලාංකිකයා බවට දුලීප් මෙන්ඩිස් පත්විය.
ඉන් අනතුරුව අසංක ගුරුසිංහ (1991), අරවින්ද ද සිල්වා (1997 - දෙවරක්), තිලකරත්න ඩිල්ෂාන් (2009), කුමාර් සංගක්කාර (2013, 2014) සහ 2024 වසරේදී බංග්ලාදේශයට එරෙහිව ධනංජය ද සිල්වා සහ කමිඳු මෙන්ඩිස් මෙම දස්කම දක්වා තිබේ.
තවමත් ටෙස්ට් තරග 5කට (ඉනිම් 9) පමණක් ක්රීඩා කර ඇති සොනාල් දිනූෂ, මේ වනවිට ශතක 3ක් සහ අර්ධ ශතක 5ක් රැස්කරගනිමින් කැපී පෙනෙන ක්රීඩා විලාශයක් පෙන්නුම් කර ඇත.
