ඔස්ට්රේලියාව සහ සංචාරක බංග්ලාදේශ කණ්ඩායම අතර Mackay හිදී ආරම්භ වූ දෙවන හා අවසන් ටෙස්ට් ක්රිකට් තරගයේ අතිවිශිෂ්ට පන්දු යැවීමක නිරත වූ ඔස්ට්රේලියානු වේගපන්දු යවන්නෝ, බංග්ලාදේශ පළමු ඉනිම ලකුණු 64කට සීමා කිරීමට සමත් වූහ.
තරගයේ මුල සිටම ප්රතිවාදීන්ට කිසිදු ඉඩක් නොතැබූ ඔස්ට්රේලියානු පන්දු යවන්නන් හමුවේ බංග්ලාදේශ පිතිකරුවෝ දැඩි අසරණ භාවයකට පත්වූහ.
මෙම අතිවිශිෂ්ට පන්දු යැවීමේ පෙරමුණ ගත් මිචෙල් ස්ටාක් පන්දුවාර 10ක් පමණක් යොමුකරමින්, ලකුණු 12කට කඩුලු 6ක් දවාගැනීමට සමත් විය.
මෙය ඔහු ටෙස්ට් ක්රිකට් පිටියේ කඩුලු 5 සපිරූ 19වන අවස්ථාව ලෙස සටහන් විය.
ඔහුට මනා සහයක් දුන් නායක පැට් කමින්ස් ලකුණු 25කට කඩුලු 3ක් බිඳහෙලූ අතර, මේ හේතුවෙන් ඉනිමේ 16වැනි පන්දුවාරය වන විට බංග්ලාදේශ ලකුණු පුවරුව ලකුණු 21කට කඩුලු 6ක් ලෙස සටහන් වී තිබිණි.
බංග්ලාදේශ ආරම්භක පිතිකරු යුගලය ඇතුළුව සමස්ත ඉනිමේදී පිතිකරුවන් සිව්දෙනෙකුම කිසිදු ලකුණක් නොලබා (ලකුණු ලබාගැනීමට පෙර) දැවීයාම කැපී පෙනෙන සිදුවීමක් විය.
අසරණ වූ බංග්ලාදේශ ඉනිමේ වැඩිම ලකුණු ලාභියා බවට පත්වූයේ අවසන් පිතිකරු ලෙස පිටියට පිවිසි ශොරිෆුල් ඉස්ලාම් ය.
ඔහු නොදැවී ලකුණු 14ක් රැස්කරමින් කණ්ඩායමේ ලකුණු සංඛ්යාව 60 සීමාවෙන් ඔබ්බට ගෙන යාමට ක්රියා කළේය.
දෙරට අතර පළමු ටෙස්ට් තරගයෙන් කඩුලු 9ක ජයක් ලැබීමට බංග්ගාදේශය සමත්විය.
