ඉන්දියානු නාවික හමුදාව සඳහා 'MQ-9B සී ගාඩියන්' වර්ගයේ දීර්ඝ කාලයක් ගුවනේ රැඳීසිටිය හැකි ඩ්රෝන යානා දෙකක් බදු පදනම මත ලබා ගැනීමට අමෙරිකාවේ General Atomics Aeronautical Systems සමාගම සමග ගිවිසුමකට එළඹි බව ඉන්දියාව පවසයි.
මාස 30ක කාලසීමාවක් සඳහා බලපැවැත්වෙන මෙම ගිවිසුමේ සමස්ත වටිනාකම ඉන්දීය රුපියල් බිලියන 19.43ක් හෙවත් අමෙරිකානු ඩොලර් මිලියන 203ක් වෙයි.
මෙම ගිවිසුම හරහා ඉන්දීය නාවික හමුදාවේ මුහුදු සීමා නිරීක්ෂණ හැකියාවන් සැලකිය යුතු ලෙස ඉහළ යන අතර, ඉන්දියන් සාගර කලාපයේ සිදුවන වර්ධනයන් පිළිබඳව සමීපව නිරීක්ෂණය කිරීමටත්, ඒ සඳහා ප්රතිචාර දැක්වීමටත් ඇති හැකියාව තවදුරටත් ශක්තිමත් වන බව ඉන්දීය රජය නිකුත් කළ නිල නිවේදනයක දැක්වෙයි.
මීට පෙර 2020 වසරේදී ද ඉන්දීය නාවික හමුදාව විසින් එම සමාගමෙන් වසරක කාලයක් සඳහා 'MQ-9A සී ගාඩියන්' ඩ්රෝන යානා දෙකක් බදු පදනම මත ලබාගත් අතර, එම කාලසීමාව පසුව තවදුරටත් දීර්ඝ කිරීමට පියවර ගෙන තිබුණි.
අමෙරිකාවෙන් ආයුධ සන්නද්ධ විශාල ප්රමාණයේ ඩ්රෝන යානා මිලදී ගැනීමට ඉන්දියාව කාලයක සිට දැඩි උනන්දුවක් දක්වා තිබුණි.
ඒ අනුව, 'MQ-9B ස්කයි ගාඩියන්' සහ 'සී ගාඩියන්' වර්ගයේ සන්නද්ධ ඩ්රෝන යානා 31ක් මිලදී ගැනීම සඳහා ඉන්දිය රජය විසින් අමෙරිකානු රාජ්ය දෙපාර්තමේන්තුව සමඟ 2024 වසරේදී ගිවිසුමකටද අත්සන් තබා තිබුණි.
