ප්‍රසිද්ධ ඔස්ට්‍රේලියානු ටෙනිස් ක්‍රීඩක නික් කිරිඕස් (Nick Kyrgios) කොකේන් මත්ද්‍රව්‍ය භාවිත කළ බවට තහවුරු වීමත් සමඟ ඔහුට ටෙනිස් ක්‍රීඩාවෙන් තාවකාලික තහනමක් පනවා තිබේ.

ජාත්‍යන්තර ටෙනිස් අඛණ්ඩතා නියෝජිතායතනය (ITIA) සඳහන් කළේ, 31 හැවිරිදි  නික් කිරිඕස් පසුගිය ජුනි 22 වැනිදා පැවති 'Mallorca Open' තරඟාවලිය අතරතුර ලබා දුන් මුත්‍රා සාම්පලයක කොකේන් පරිවෘත්තීය ද්‍රව්‍යයක් වන 'බෙන්සොයිලෙකොනීන්' (benzoylecgonine) අඩංගු බවට අනාවරණය වී ඇති බවය.

ඒ අනුව ඔහු අගෝස්තු 4 වන දින සිට ක්‍රියාත්මක වන පරිදි තාවකාලිකව ක්‍රීඩාවෙන් ඉවත් කර ඇත.

ඉන්ස්ටග්‍රෑම් සටහනක් තබමින් කිරිඕස් පවසා ඇත්තේ  "ලොකු අත්වැරැද්දක්" කර ඇති බවත්, ඒ සඳහා "සම්පූර්ණ වගකීම" භාර ගන්නා බවත්ය.

මෑත කාලීනව දණහිසේ සහ මැණික් කටුවේ ඇති වූ ආබාධ හේතුවෙන් දැඩි මානසික හා ශාරීරික පීඩාවකට මුහුණ දුන් බවත්, තම වෘත්තීය ජීවිතයේ අවසාන අදියරට ළඟා වෙමින් තිබීම බලාපොරොත්තු වූවාට වඩා දැඩි අභියෝගයක් වූ බවත් ඔහු පවසා තිබේ.

කෙසේ වෙතත්, "මම කළ දේට කිසිවක් සාධාරණීකරණය කළ නොහැකියි" යැයි ඔහු වැඩිදුරටත් සඳහන් කර ඇත.

තමා රසිකයන්ගෙන්, පවුලේ අයගෙන් සහ විශේෂයෙන් තමා අනුගමනය කරන දරුවන්ගෙන් සමාව ඉල්ලා සිටින බවත්, මනස සුව කර ගැනීම සඳහා ඉදිරි දින 28 තුළ සමාජ මාධ්‍ය සහ ප්‍රසිද්ධ ජීවිතයෙන් ඉවත් වන බවත් ඔහු සඳහන් කර ඇත.

මෙම තහනම යටතේ විනය පරීක්ෂණයක ප්‍රතිඵල නිකුත් වන තෙක් කිරිඕස්ට ග්‍රෑන්ඩ් ස්ලෑම් හෝ වෙනත් අනුමත කරන ලද කිසිදු තරඟයකට ක්‍රීඩා කිරීමට, පුහුණු කිරීමට හෝ සහභාගී වීමට අවසර නොලැබේ.

ජාත්‍යන්තර ටෙනිස් අඛණ්ඩතා නියෝජිතායතනය ප්‍රකාශ කළේ ඔහුට මෙම තාවකාලික තහනමට එරෙහිව ඇපැලක් ඉදිරිපත් කිරීමට අවස්ථාව තිබුණද, මේ දක්වා ඔහු එය සිදු කර නොමැති බවය.

සිය ටෙනිස් දිවිය තුළ ATP සංචාරක ශූරතා 7ක් දිනා ඇති කිරිඕස්, 2022 වසරේ විම්බල්ඩන් අවසන් මහා තරඟයට සහ ඔස්ට්‍රේලියානු විවෘත පිරිමි යුගල ශූරතාවට (තනාසි කොක්කිනාකිස් සමඟ එක්ව) හිමිකම් කීවේය.

කෙසේ වෙතත්, ඔහුගේ දැඩි හැසිරීම් රටාව, මීට පෙර හිටපු පෙම්වතියකට පහර දීමක් සම්බන්ධයෙන් චෝදනා ලැබීම සහ මානසික සෞඛ්‍ය ගැටලු හේතුවෙන් ඔහු නිරන්තරයෙන්ම මාධ්‍ය අවධානයට ලක් වූ ක්‍රීඩකයෙකි.