පාස්කු නඩුවේ විත්තිකරුවන්ගේ විත්තිවාචක ඉදිරිපත් කිරීම ඇරඹෙයි

පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් කුමන්ත්‍රණය කිරීම ඇතුළු චෝදනා විසි තුන් දහසකට අධික සංඛ්‍යාවක් යටතේ ගොනුකර තිබෙන නඩුවේ විත්තිකරුවන් විසින් තමන්ගේ විත්තිවාචක ඉදිරිපත් කිරීම අද (17) කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේ ආරම්භ කළේය.

නවරත්න මාරසිංහ, රාමනාදන් කන්නන් සහ සුජීව නිශ්ශංක යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ලක් ඉදිරියේ මෙම නඩු විභාගය පැවැත්වේ.

මෙම නඩුව කැඳවූ අවස්ථාවේදී එහි විත්තිකරුවන් වශයෙන් නම්කර සිටින සෙයිනුල් ආබ්දීන් මොහොමඩ් ජෙසීම්, මොහොමඩ් මුස්තාපා මොහොමඩ් රිස්වාන්, මීරා සහිර් මොහොමඩ් නෆ්ලි යන විත්තිකරුවන් විත්තිකූඩුවේ සිට සිය ප්‍රකාශය ඉදිරිපත් කිරීම සිදුකර තිබේ.

මෙම නඩුවේ විත්තිකරුවන් 24 දෙනෙකු නම්කර තිබෙන අතර ඔවුන් රිමාන්ඩ් භාරයේ පසුවෙයි. 

විත්තිකරුවන් විසින් විත්තියේ සාක්ෂි ඉදිරිපත් කිරීම තවදුරටත් සිදුවනු ලැබේ.