ශ්‍රී ලංකාවට එරෙහිව ගාල්ල ජාත්‍යන්තර ක්‍රිකට් ක්‍රීඩාංගණයේදී අද (15) ආරම්භ වූ තරගය, ඉන්දියාව සිය ටෙස්ට් ක්‍රිකට් පිටියේ ක්‍රීඩාකරන 600 වැනි ටෙස්ට් තරගය ලෙස වාර්තා අතරට එක්විය.

ඒ අනුව එංගලන්තය (තරග 1097) සහ ඔස්ට්‍රේලියාවට (තරග 883) පසු ලෝක ටෙස්ට් ක්‍රිකට් ඉතිහාසයේ තරග 600 සන්ධිස්ථානය පසුකළ තෙවැනි කණ්ඩායම බවට ඉන්දියාව පත්විය.

1877 වසරේ දී මංගල ටෙස්ට් තරගයට එක්වූ ඔස්ට්‍රේලියාව සහ එංගලන්තය මෙන්ම දකුණු අප්‍රිකාව (1889 දී), බ.ඉ. කොදෙව් (1928 දී) සහ නවසීලන්තය (1930 දී) ඉන්දියාවට පෙර ටෙස්ට් වරම් ලැබූ රටවල්ය.

ඒ අනුව ලොව 6 වැනි පැරණිම ටෙස්ට් කණ්ඩායම වන ඉන්දියාව, සිය මංගල ටෙස්ට් තරගයට 1932 ජුනි මාසයේදී ඓතිහාසික ලෝඩ්ස් හිදී එංගලන්තයට එරෙහිව ක්‍රීඩාකළ අතර, එහිදී ලකුණු 158ක දැවැන්ත පරාජයක් ලැබීමට සිදුවිය.

ඔවුන් තම 100 වැනි ටෙස්ට් තරගයට 1967 දී එංගලන්තයට එරෙහිවද, 200 වැනි තරගයට 1992 දී පාකිස්තානයට එරෙහිවද, 300 වැනි තරගයට 1996 දී දකුණු අප්‍රිකාවට එරෙහිවද, 400 වැනි තරගයට 2006 දී කොදෙව්වන්ට එරෙහිවද, 500 වැනි තරගයට 2016 දී නවසීලන්තයට එරෙහිවද ක්‍රීඩා කර තිබේ.

ඉන්දියාව ටෙස්ට් වරම් ලබා සිය පළමු ජයග්‍රහණය වාර්තා කිරීමට වසර 20ක් (තරග 25කට) ගතවී ඇත.

1952 පෙබරවාරි 10 වැනිදා විජේ හසාරේගේ නායකත්වයෙන් චෙන්නායි හිදී එංගලන්තය ඉනිමකින් සහ ලකුණු 8කි පරාජය කර එම ඉතිහාසගත ජය වාර්තාකර තිබේ.

එම කාලය තුළ ඔවුන් එංගලන්තය, ඔස්ට්‍රේලියාව සහ බ.ඉ. කොදෙව්වන් සමග ටෙස්ට් තරග ක්‍රීඩාකර ඇති අතර, එහිදී පරාජ 12ක් ලබා සෙසු තරග ජය පරාජයෙන් තොරව අවසන්කර ඇත.

20 වැනි සියවස අගභාගය වන තෙක්ම ටෙස්ට් පිටියේ පහළ මට්ටමක පසුවූ ඉන්දියාව, එවකට තමන්ට වඩා අඩු තරග ප්‍රමාණයක් ක්‍රීඩා කර සිටි පාකිස්තානයට පවා පිටුපසින් සිටියේය.

නමුත් 21 වැනි සියවස උදාවීමත් සමග ඔවුන්ගේ විශාල පිබිදීමක් සිදු විය.

ගෙවුණු වසර 25ක කාලය තුළ ඉන්දියාව ක්‍රීඩා කළ ටෙස්ට් තරග 263න් තරග 123ක්ම ජයග්‍රහණය කිරීමට සමත්ව ඇත.

මෙම නව පුනර්ජීවනයේ තීරණාත්මක කාලපරිච්ඡේදය සනිටුහන් වූයේ එම්. එස්. දෝනිගෙන් 2014 වසරේදී ටෙස්ට් නායකත්වය විරාත් කෝලිට ලැබීමත් සමගය.

කෝලිගේ නායකත්වය යටතේ ක්‍රීඩාකළ තරග 68න් තරග 40ක්ම ජයග්‍රහණය කරමින් ඉන්දීය ටෙස්ට් ක්‍රිකට් ඉතිහාසයේ සාර්ථකම කාලපරිච්ඡේදයක් පසුකළේය.

ඉන්දියාවේ 80 වැනි නිදහස සැමරුම යෙදෙන අද දිනයේ ඔවුන් මෙම සුවිශේෂි සන්ධිස්ථානය පසුකිරීමද කැපී පෙනේ.

ඉන්දියාවේ ටෙස්ට් තරගවල ප්‍රගතිය

ටෙස්ට් තරග 25කට පසු –
ජය : 1, පරාජ: 12, ජයපරාජයෙන් තොර: 12

ටෙස්ට් තරග 100කට පසු –
ජය : 10, පරාජ: 40, ජයපරාජයෙන් තොර: 50

ටෙස්ට් තරග 200කට පසු –
ජය: 35, පරාජ: 72, ජයපරාජයෙන් තොර: 93, සමතත්ත්වයෙන්: 1

ටෙස්ට් තරග 300කට පසු –
ජය: 56, පරාජ: 98, ජයපරාජයෙන් තොර: 145, සමතත්ත්වයෙන්: 1

ටෙස්ට් තරග 400කට පසු –
ජය: 88, පරාජ: 129, ජයපරාජයෙන් තොර: 182, සමතත්ත්වයෙන්: 1

ටෙස්ට් තරග 500කට පසු –
ජය: 130, පරාජ: 157, ජයපරාජයෙන් තොර: 212, සමතත්ත්වයෙන්: 1

ටෙස්ට් තරග 599කට පසු –
ජය: 186, පරාජ: 188, ජයපරාජයෙන් තොර: 224, සම තත්ත්වයෙන්: 1