Intex - InMac Sri Lanka 2026 - BMICH හිදී ඇරඹෙයි
August 5, 2026 06:37 pm
දකුණු ආසියාවේ ප්රමුඛතම ජාත්යන්තර රෙදිපිළි සහ ඇඟලුම් තාක්ෂණික ප්රදර්ශනය වන 'Intex - InMac Sri Lanka 2026' අද (05) කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) උත්කර්ෂවත් ලෙස ආරම්භ විය.
කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතාගේ ප්රධානත්වයෙන් විවෘත වූ මෙම ප්රදර්ශනය එළැඹෙන අගෝස්තු 7 වැනිදා දක්වා පැවැත්වේ.
රටවල් 15කට අධික සංඛ්යාවකින් පැමිණි ප්රදර්ශකයින් 250කට වැඩි පිරිසක් මෙවර ප්රදර්ශනයට එක්ව සිටිති.
සමාරම්භක උත්සවය ඇමතූ අමාත්ය සුනිල් හඳුන්නෙත්ති මහතා සඳහන් කළේ, ශ්රී ලංකාවේ වැඩිම අපනයන ආදායමක් උපයා දෙන, ජාතික ආර්ථිකයේ ප්රධානතම කුළුණක් වන ඇඟලුම් කර්මාන්තයේ ඉදිරි ගමන සඳහා නවෝත්පාදනය, කාර්යක්ෂමතාව සහ නව තාක්ෂණය අත්යවශ්ය වන බවයි.
මෙම ප්රදර්ශනය විදේශීය ආයෝජන ආකර්ෂණය කර ගැනීමට මෙන්ම තාක්ෂණික හුවමාරුව සඳහා ද මහඟු පිටිවහලක් වන බව අමාත්යවරයා පෙන්වා දුන්නේය.
තවද, මෑතකදී ඉන්දියාවේ පැවැති 'Bharat Tex' ප්රදර්ශනය අතරතුර ඉන්දීය අමාත්යවරයා හමුවී ද්විපාර්ශ්වික නිදහස් වෙළෙඳ ගිවිසුම, ඇඟලුම් අපනයන කෝටා සහ GSP+ සහන සම්බන්ධයෙන් සාර්ථක සාකච්ඡා පැවැත්වූ බවද හෙතෙම මෙහිදී සිහිපත් කළේය.
මෙම සමාරම්භක අවස්ථාව සඳහා කර්මාන්ත සංවර්ධන මණ්ඩලයේ සභාපති යසස් හේවගේ, අපනයන සංවර්ධන මණ්ඩලයේ සභාපති මංගල විජේසිංහ සහ ඒකාබද්ධ ඇඟලුම් සංසදයේ සභාපති ෆීලික්ස් ප්රනාන්දු යන මහත්වරුන් ඇතුළු රාජ්ය නිලධාරීන්, තානාපතිවරුන් හා විදේශීය නියෝජිතයින් රැසක් සහභාගී වූහ.
