මීගමුවේ ගැටුම ගැන CID විමර්ශන අරඹයි - මියගිය නිලධාරීන් 8 දෙනාට උසස්වීම්

මීගමුව බන්ධනාගර ගැටුමෙන් ජීවිතක්ෂයට පත්වූ නිලධාරීන් 8 දෙනාට බන්ධනාගාර දෙපාර්තමේන්තුව උසස් වීම් ලබාදී තිබේ.

මීගමුව බන්ධනාගාරයේ ඛේදවාචකයෙන් බන්ධනාගාර නිලධාරීන් 8දෙනෙක් හා රැඳවියන් 21 දෙනෙක් ජීවිතක්ෂයට පත්වුණි.

සිද්ධිය පිළිබඳ විමර්ශන අපරාධ පරීක්ෂණ දෙපාර්තමේන්තුවට භාර කෙරුණු අතර ඒ අනුව මේ වනවිට විමර්ශන මීගමුව රෝහලේ හා කොළඹ ජාතික රෝහලේ ප්‍රතිකාර ලබන බන්ධනාගාර නිලධාරීන්ගෙන් හා රැඳවියන්ගේ ප්‍රකාශ ලබාගැනීම ආරම්භ කර තිබේ.

කොළඹ ජාතික රෝහලේ ප්‍රතිකාර ලබන නිලධාරීන් හා රැඳවියන් 29 දෙනෙකුගෙන් මේ වනවිට ප්‍රකාශ සටහන්කරගෙන ඇත.

ඒ අතර සිටින සියලුම රැඳවියන් කටුවැල්ලේගම සුරේෂ්ගේ පාර්ශ්වයෙන් පහරකෑමට ලක්වී ඇති බව පොලිසිය පවසයි.

කොළඹ ජාතික රෝහලේ ප්‍රතිකාර ලබමින් සිටින බන්ධනාගාර නිලධාරීන්ගෙන්ද මේ වනවිට ප්‍රකාශ සටහන් කරගෙන ඇති අතර එය මෙතෙක් සම්පූර්ණ කිරීමට හැකි වී නොමැත.

ඒ ඇතැම් නිලධාරීන් ප්‍රකාශ ලබාදීම සඳහා මෙතෙක් සුදුසු සෞඛ්‍ය තත්ත්වයකින් නොසිටීම හේතුවෙනි.

මේ අතර ගැටුමෙන් ජීවිතක්ෂයට පත් බන්ධනාගාර නිලධාරීන් 8 දෙනාට උසස්වීම් ලබාදී තිබේ.

ඝාතනයට ලක්වූ දෙවන පෙළ ජේලර් S.H.S.චන්ද්‍රවංශ මහතා පළමු පෙළ ජේලර්වරයෙක් ලෙසත්, සෙසු නියාමකවරු සැරයන් තනතුරුවලටත් උසස්කර ඇති බව බන්ධනාගාර දෙපාර්තමේන්තුව පැවසීය.

මේ අතර මීගමුව බන්ධනාගාරයේ කාන්තා අංශයේ රැඳවියන් සියලුදෙනාම වෙනත් බන්ධනාගාර වෙත අද මාරු කර යැවුණි.

බන්ධනාගාරයේ ඇතිවූ ගැටුමේදී බරපතළ තුවාල ලබා කොළඹ ජාතික රෝහලේ ප්‍රතිකාර ලබමින් සිටියදී මියගිය සැරයන් ගමගේ උපාලි මහතාගේ දේහය අද කඹුරුපිටියේ පිහිටි ඔහුගේ නිවස වෙත රැගෙන ආවේය.

මේ අතර ගැටුමෙන් මියගිය සැරයන් රුවන් තිලකසිරි මහතාගේ දේහය පිළිබඳ අවසන් කටයුතු අද පස්වරුවේ සිදුකෙරුණේ අඹගහවැව පොදු සුසාන භූමියේදීය.