පුනරුත්ථාපනය වන තරුණ ප්රජාව වෘත්තිමය රැකියාවලට යොමු කිරීමට වැඩසටහනක්
June 30, 2026 08:10 pm
මත්ද්රව්යවලට යොමුවී පුනරුත්ථාපනය වන තරුණ ප්රජාව වෘත්තිමය රැකියාවලට යොමු කිරීමට කර්මාන්ත අමාත්යාංශය වැඩසටහනක් ආරම්භ කර තිබේ.
පුනරුත්ථාපනය වූ එම තරුණ තරුණියන් පෞද්ගලික අංශයේ ස්ථීර වෘත්තිමය රැකියා සඳහා යොමු කිරීම මෙමගින් අපේක්ෂා කරන අතර අන්ත්රාකාරී ඖෂධ පාලන ජාතික මණ්ඩලය, පුනරුත්ථාපන කාර්යාංශය හා වෘත්තීය පුහුණු අධිකාරිය සමඟ ඒකාබද්ධව මෙම වැඩසටහන ක්රියාත්මක කරනු ලබයි.
කර්මාන්ත සංවර්ධන අමාත්ය සුනිල් හඳුන්නෙත්ති මහතා සහ අමාත්යාංශ ලේකම් තිලකා ජයසුන්දර මහත්මියගේ ප්රධානත්වයෙන් මේ පිළිබඳව විශේෂ සාකච්ඡාවක් අමාත්යාංශ පරිශ්රයේදී අද (30) පැවැත්විණි.
මෙහිදී අදහස් දක්වමින් අමාත්යවරයා පැවසුවේ මේ වන විට පෞද්ගලික අංශයේ කර්මාන්ත ක්ෂේත්රයේ රැකියා පුරප්පාඩු ලක්ෂ 4කට අධික ප්රමාණයක් බවතින බවත් එම පුරප්පාඩු සඳහා ප්රමාණවත් පුහුණ හා නොපුහුණු සේවකයින් නොමැති බවය.
මේ හේතුවෙන් ඉන්දියාව, චීනය වැනි රටවලින් විදේශීය ශ්රමිකයින් ගෙන්වා ගැනීමට දේශීය කර්මාන්තකරුවන්ට සිදුව ඇති බවද අමාත්යවරයා මෙහිදී පැවසීය.
විශේෂයෙන් ඉදිකිරීම්, ටයිල් හා උපාංග, පාවහන්, සම්භාණ්ඩ, ඔටෝ මොබයිල් ඇතුළු කර්මාන්ත ක්ෂේත්ර රැසක මෙලෙස පුරප්පාඩු පවතින බව පෙන්වාදුන් හදුන්නෙත්ති අමාත්යවරයා කර්මාන්ත අමාත්යාශයේ සෘජු මැදිහත්වීම මත ක්රමවත් පුහුණුවක් හා වැඩපිළිවෙළක් යටතේ කර්මාන්තකරුවන් වෙත පුනරුත්ථාපනය කරන ලද ශ්රමික පිරිස් යොමු කිරීමට නිලධාරීන්ට මෙහිදී උපදෙස් ලබා දෙන ලදී.
මේ වනවිට විවිධ කර්මාන්ත ක්ෂේත්රවල වෘත්තීය පුහුණුව ලත් පුනරුප්තාපනය වූ තරුණ තරුණියන් දසදහසක් පමණ දෙනා සිටින බවත් වවුනියා, සේනපුර හා කන්දකාඩු යන පුනරුත්ථාපන මධ්යස්ථාන තුනෙන් වසරකට 800 ක පමණ මත්ද්රව්ය වලට ඇබ්බැහිවූ පිරිසක් පුනරුත්ථාපනය කර වෘත්තීය පුහුණුව සමඟ නැවත සමාජගත කරන බව මෙහිදී අනාවරණය විය.
මෙම සාකච්ඡාව සඳහා කර්මාන්ත අමාත්යංශයේ අතිරේක ලේකම්වරුන් වන S.W.C. ජයමිණි, සුසන්ත ජයතිලක ඇතුළු කර්මාන්ත අමාත්යංශයේ නිලධාරීන්, පුනරුත්ථාපන කාර්යාංශයේ සභාපති මහාචාර්ය වසන්තා සුභසිංහ, අන්ත්රාකාරී ඖෂධ පාලන ජාතික මණ්ඩලයේ සභාපති විශ්රාමික නියෝජ්ය පොලිස්පති J.A.K. මාර්ක් ඇතුළු අන්ත්රාකාරී ඖෂධ පාලන ජාතික මණ්ඩලයේ නිලධාරීන්, වෘත්තීය පුහුණු අධිකාරීයේ නිලධාරින් ඇතුළු පිරිසක් සහභාගී වූහ.
