අමෙරිකාවෙන් ශ්රී ලංකා නාවික හමුදාවට උසස් චන්ද්රිකා සන්නිවේදන පද්ධතියක්
June 22, 2026 10:37 pm
එක්සත් ජනපදය විසින් ශ්රී ලංකා නාවික හමුදාවේ අක්වෙරළ මුර සංචාර යාත්රා බලඇණිය සඳහා උසස් චන්ද්රිකා සන්නිවේදන පද්ධතියක් ලබාදීමට තීරණය කර තිබේ.
අද (22) කොළඹ වරායේ SLNS ගජබාහු නෞකාවේදී, දකුණු සහ මධ්යම ආසියානු කටයුතු පිළිබඳ එක්සත් ජනපද සහකාර රාජ්ය ලේකම් පෝල් කපූර් මහතා විසින් ලොව කාර්යබහුලම නාවික ගමන් මාර්ග කිහිපයක් ඔස්සේ සමුද්රීය සන්නිවේදන හැකියාවන් ශක්තිමත් කරමින්, ශ්රී ලංකා නාවික හමුදාවට Fleet Broadband චන්ද්රිකා සන්නිවේදන තාක්ෂණය ලබාදීම පිළිබඳව නිවේදනය කළේය.
එම අවස්ථාවට ආරක්ෂක නියෝජ්ය අමාත්ය මේජර් ජෙනරාල් අරුණ ජයසේකර (විශ්රාමික) සහ ශ්රී ලංකා නාවික හමුදාපති වයිස් අද්මිරාල් කාංචන බානගොඩ මහතා සහභාගී වු අතර, ඔවුන් විසින් පෝල් කපූර් මහතාව පිළිගනු ලැබීය.
එහිදී සමුද්රීය සහයෝගීතාව මෙන්ම ජාත්යන්තර නාවික මාර්ගවල ආරක්ෂාව තහවුරු කිරීම, කලාපීය ආපදා ප්රතිචාර මෙහෙයුම් සඳහා සහාය වීම සහ ඉන්දියානු සාගරය පුරා සිදුවන නීතිවිරෝධී ක්රියාකාරකම් මැඩපැවැත්වීම සඳහා දියුණු එක්සත් ජනපද සන්නිවේදන තාක්ෂණය ඉටුකරන කාර්යභාරය පිළිබඳව සාකච්ඡා කර තිබේ.
Fleet Broadband පද්ධතිය සමඟින්, ශ්රී ලංකා නාවික බලඇණිය ඒකාබද්ධ අභ්යාසවලදී හෝ සැබෑ මෙහෙයුම්වලදී මුහුදේ සාමය සහ ආරක්ෂාව ප්රවර්ධනය කිරීම සඳහා හවුල්කාර රටවල් සමඟ බාධාවකින් තොරව කටයුතු කිරීමට වඩා හොඳින් සන්නද්ධ වනු ඇත.
අමෙරිකානු ඩොලර් මිලියන 4ක් පමණ වටිනාකමින් යුත් මෙම පද්ධතිය වෙරළබඩ පරාසයෙන් බොහෝ දුරින් ක්රියාත්මක වන අවස්ථාවලදී පවා විශ්වාසනීය හඬ, දත්ත සහ තොරතුරු හුවමාරුව සහතික කරමින්, ආරක්ෂිතව නැවෙන්-නැවට සහ නැවෙන්-වෙරළට සන්නිවේදන පහසුකම් සපයයි.
මෙම පද්ධතිය මඟින් ශ්රී ලංකා නාවික හමුදාවට ඉන්දියානු සාගරයේ දුරස්ථ ප්රදේශ ඇතුළුව විශාල සමුද්රීය කලාප පුරා මූලස්ථානය, ගුවන් යානා සහ අනෙකුත් නෞකා සමඟ තත්ය කාලීන සම්බන්ධතාව පවත්වා ගැනීමට හැකියාව ලැබේ.
මෙම වැඩිදියුණු කළ හැකියාව මඟින් සමුද්රීය ක්ෂේත්ර පිළිබඳ දැනුවත්භාවය ශක්තිමත් කිරීම, මෙහෙයුම් සම්බන්ධීකරණය වැඩිදියුණු කිරීම, හදිසි අවස්ථාවන්ට වේගවත් ප්රතිචාර දැක්වීමට සහාය වීම, නීතිවිරෝධී ජාවාරම්වල නියැලෙන යාත්රා මැදිහත් වී නතර කිරීමට සහ අත්අඩංගුවට ගැනීමට උපකාර කිරීම, සම්බාධක පනවා ඇති යාත්රා නිරීක්ෂණය කිරීමට හා එක්සත් ජනපද සහ ගෝලීය සැපයුම් මාර්ග ආරක්ෂා කිරීමට දායකවනු ඇත.
