අත්අඩංගුවට ගැනීම වැළැක්වීමේ නියෝගයක් ඉල්ලා SDIG වරුණ ජයසුන්දරගෙන් පෙත්සමක්
June 10, 2026 11:28 am
පාස්කු ඉරිදා ත්රස්ත ප්රහාර සිද්ධිය සම්බන්ධයෙන් සිදුකරන විමර්ශනවලට අදාළව කිසිදු සාධාරණ හේතුවක් නොමැතිව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා ජ්යේෂ්ඨ නියෝජ්ය පොලිස්පති වරුණ ජයසුන්දර මහතා විසින් අභියාචනාධිකරණයට රිට් පෙත්සමක් ඉදිරිපත් කර තිබේ.
මෙම පෙත්සමේ වගඋත්තරකරුවන් ලෙස ලෙස පොලිස්පතිවරයා, නීතිපතිවරයා ඇතුළු පිරිසක් නම් කර ඇත.
මෙම පෙත්සම අද (10) කරුණු තහවුරු කිරීම සඳහා අභියාචනාධිකරණ විනිසුරුවරුන්වන ශෂී මහේන්ද්රන් සහ ආදීත්ය පටබැඳීගේ යන මහත්වරුන්ගේ සමන්විත අභියාචනාධිකරණ විනිසුරු මඩුල්ල ඉදිරියේ කැඳවා තිබේ.
එහිදී රජයේ නීතිඥවරිය අධිකරණයට දැනුම්දුන්නේ මෙම සිද්ධියට අදාළව වග උත්තරකරුවන්ගෙන් උපදෙස් ලබා ගැනීමට අවශ්ය බවත් ඒ සඳහා කාලය ලබා දෙන ලෙසත් ඉල්ලා සිටින බවයි.
එහිදී පෙත්සම්කාර නියෝජ්ය පොලිස්පතිවරයා වෙනුවෙන් පෙනී සිටි නීතිඥ සුරේන් ඤාණරාජ් මහතා අධිකරණය හමුවේ කරුණු දක්වමින් මෙම පෙත්සම්කරු අත්අඩංගුවට ගැනීමේ අත්යසන්න තත්ත්වයක් උද්ගත වී ඇති නිසා මෙම පෙත්සම ඉදිරිපත් කළ බව පවසා ඇත.
එහිදී විනිසුරු මඩුල්ල නියම කර ඇත්තේ, මෙම පෙත්සම කරුණු තහවුරු කිරීම සඳහා ලබන සඳුදා කැඳවන ලෙසයි.
එම අවස්ථාවේදී පෙත්සම්කාර පාර්ශ්වයේ නීතිඥවරයා සඳහන් කළේ පෙත්සම්කරු අත්අඩංගුවට ගැනීමේ අත්යසන්න තත්ත්වයක් උද්ගතවීම නිසා මෙම පෙත්සම ඉදිරිපත් කළ බවත් එළඹෙන සති අන්තයේ ඕනෑම දෙයක් සිදු වීමට හැකියාව තිබෙන හෙයින් අදාල පෙත්සම කරුණු තහවුරු කිරීම සඳහා මෙම සතිය තුළ දිනයක් ලබා දෙන ලෙස ඉල්ලා ඇත.
ඉදිරිපත් වූ කරුණු සලකා බැලූ අභියාචනාධිකරණ විනිසුරු මඩුල්ල මෙම පෙත්සම ලබන 12 වනදා කරුණු තහවුරු කිරීම සඳහා කැඳවන ලෙස නියම කර තිබේ.
පෙත්සම්කරු පවසා ඇත්තේ පාස්කු ඉරුදින ත්රස්ත ප්රහාර සිද්ධිය සම්බන්ධයෙන් සිදුකරන විමර්ශනවලට අදාළව තමන්ව කිසිදු සාධාරණ පදනමක් නොමැතිව අත්අඩංගුවට ගැනීමේ අනතුරක් උද්ගතව තිබෙන බවයි.
එබැවින් තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා ඔහු මෙම පෙත්සම සිය නීතිඥවරු මාර්ගයෙන් අභියාචනාධිකරණයට ඉදිරිපත් කර තිබේ.
