පොලිසියේ 3කගේ සේවා කාලය පසුදාතම කිරීමට ගත් තීරණයට එරෙහි තීන්දුවක්

පොලිස් අධිකාරිවරු දෙදෙනෙකු සහ සහකාර පොලිස් අධිකාරිවරයෙකුගේ සේවා කාලය පසුදාතම කොට (Backdate) සැකසීමට එවක පොලිස්පතිවරයාගේ නිර්දේශ මත ජාතික පොලිස් කොමිසම විසින් ගනු ලැබූ තීරණය, නීතියට පටහැනි බවත් ඒ තුළින් මූලික මිනිස් අයිතිවාසිකම් උල්ලංඝනය වීමක් සිදුවන බවත් ශ්‍රේෂ්ඨාධිකරණය අද (27) තීන්දු කළේය.

ඒ අනුව පොලිස් අධිකාරිවරුන් වන බී.එම්.ඒ. බණ්ඩාරනායක, මනෝජ් රණගල සහ සහකාර පොලිස් අධිකාරී ඒ.ආර්.පී.ජේ. අල්විස් යන අයට උසස්වීම් පිරිනැමීමේදී ඔවුන්ගේ සේවා කාලය පසුදාතම කොට නිර්දේශ කරමින් 2020 වසරේ ජනවාරි මස 27 වනදා පොලිස්පතිවරයා විසින් ජාතික පොලිස් කොමිසම වෙත යොමු කර තිබූ ලේඛන බල රහිත බව තීන්දුවේ සඳහන් විය.

වගඋත්තරකාර නිලධාරීන් තිදෙනාගේ සේවා කාලය පසුදාතම කිරීම අභියෝගයට ලක්කරමින් ජ්‍යෙෂ්ඨ පොලිස් අධිකාරිවරු පිරිසක් විසින් ඉදිරිපත් කර තිබූ මූලික අයිතිවාසිකම් පෙත්සම් 4ක් විභාග කිරීමෙන් අනතුරුව මහින්ද සමයවර්ධන, සම්පත් විජේරත්න යන මහත්වරුන්ගේ එකඟත්වය ඇතිව අගවිනිසුරු ප්‍රීති පද්මන් සූරසේන මහතා විසින් මෙම තීන්දුව ප්‍රකාශයට පත් කරනු ලැබීය.

මෙම පෙත්සමේ වගඋත්තරකරුවන් ලෙස එවක පොලිස්පති සී.ඩී. වික්‍රමරත්න, ජාතික පොලිස් කොමිසම සහ එහි සාමාජිකයින් නීතිපතිවරයා ඇතුළු පිරිසක් නම් කර තිබේ.

පෙත්සන්කරුවන් කියා සිටියේ වගඋත්තරකාර පොලිස් අධිකාරිවරු දෙදෙනා සහ සහකාර පොලිස් අධිකාරිවරයාගේ සහකාර පොලිස් අධිකාරි සේවා කාලය 2018 වසරේ ජනවාරි මස 1වනදා සිට ක්‍රියාත්මක වන පරිදි පසුදාතම කොට ක්‍රියාත්මක කිරීමට පොලිස්පතිවරයා කළ නිර්දේශය හා ඒ මත කටයුතු කරමින් ජාතික පොලිස් කොමිසම විසින් ගනු ලැබූ තීරණය තුළින් තමන්ට දැඩි අගතියක් සිදුවන බවය. 

තීන්දුව ප්‍රකාශයට පත් කරමින් අගවිනිසුරුවරයා ප්‍රකාශ කළේ වගඋත්තරකාර පොලිස් අධිකාරිවරු දෙදෙනා සහ සහකාර පොලිස් අධිකාරිවරයාට ඔවුන්ගේ සේවා කාලයේ පසුදාතම කොට සකස් කිරීම සාධාරණීකරණය කිරීමට හේතුවන කරුණු අධිකරණයට ඉදිරිපත් වී නොමැති බවය. 

ඒ අනුව පොලිස්පතිවරයාගේ ජාතික පොලිස් කොමිසමේ ක්‍රියා කලාපය තුළින් පෙත්සම්කරුවන්ගේ මූලික මිනිස් අයිතිවාසිකම් උල්ලංඝනය වීමක් සිදුවන බව තීන්දුකළ ශ්‍රේෂ්ඨාධිකරණ විනිසුරු මඩුල්ල වගඋත්තරකාර නිලධාරීන් තුන්දෙනාගේ සේවා කාලයේ පසුදාතම කිරීමට අදාළ සියලු ලේඛන බලශුන්‍ය බවට තීන්දු කරන බවත් සඳහන් කළේය.