චීන ජාතිකයින්ගේ පැමිණිල්ලෙන් එළියට ආ වැලිකඩ OICගේ සැබෑ ස්වරූපය
May 27, 2026 08:36 pm
චීන ජාතිකයන් පිරිසක් විසින් සිදුකළ පැමිණිල්ලකට අනුව පොලිස් මධ්යම අපරාධ විමර්ශන කාර්යාංශය මගින් අද (27) පෙරවරුවේ අත්අඩංගුවට ගනු ලැබූ වැලිකඩ පොලිසියේ ස්ථානාධිපති, ප්රධාන පොලිස් පරික්ෂක සමන් ජයසිංහ පිළිබඳ කරුණු රැසක් අනාවරණය කරගැනීමට විමර්ශන නිලධාරීන් සමත්ව තිබේ.
රාජගිරිය ප්රදේශයේදී ඉකුත් මැයි 2 වැනිදා චීන ජාතිකයන් පිරිසක් වැලිකඩ පොලිසිය විසින් අත්අඩංගුවට ගනු ලැබුවේ සයිබර් අපරාධ සිදුකිරීමේ චෝදනා යටතේය.
කෙසේවෙතත් ඒ අතර සිටි චීන ජාතිකයන් 19 දෙනෙකු පලාගොස් තිබුණේ ඔවුන්ගේ ගුවන් ගමන් බලපත්ර වැලිකඩ පොලිසියේ ස්ථානාධිපතිවරයා සන්තකයේ තිබියදීය.
පසුව ඔහු සමීප සබඳතාවක් පැවැත් වූ කාන්තාවක් හරහා අදාළ චීන ජාතිකයන් සම්බන්ධ කරගෙන, ගුවන් ගමන් බලපත්ර නිදහස් කිරීමට එක් අයෙකුගෙන් රුපියල් ලක්ෂ 3ක මුදලක් ඉල්ලා ඇති බව වාර්තා වේ.
කෙසේ නමුත් ඒ පිළිබඳව චීන ජාතිකයන් විසින් පොලිස්පතිවරයාට පැමිණිලි කර ඇති අතර, පොලිස්පතිවරයා එම පැමිණිල්ල පොලිස් මධ්යම අපරාධ විමර්ශන කාර්යාංශයට යොමු කර තිබේ.
ඒ අනුව ඉකුත් මැයි 17 වැනිදා එම කාර්යාංශ නිලධාරීන් වැලිකඩ පොලිසිය පරීක්ෂා කර ඇති අතර, එහිදී ස්ථානාධිපතිවරයා අදාළ ගුවන්ගමන් බලපත්ර තොගය ලොකරයක තිබී විමර්ශන නිලධාරීන්ට ලබාදී ඇත.
පසුව එම විමර්ශන භාරව සිටි වැලිකඩ පොලිසියේ නිලධාරීන් කිහිපදෙනෙකුගෙන් ඒ පිළිබඳව ප්රකාශ සටහන්කරගෙන ඇති අතර, එහිදී ඔවුන් පවසා ඇත්තේ, ස්ථානාධිපතිවරයා අදාළ ගුවන්ගමන් බලපත්ර අධිකරණයට ඉදිරිපත් නොකර ඔහු සතුව තබාගත් බවය.
එමෙන්ම ස්ථානාධිපතිවරයා සූක්ෂ්ම ලෙස පසුගිය 20 වැනිදා බී වාර්තාවක් හරහා අදාළ ගුවන්ගමන් බලපත්ර අධිකරණයට ඉදිරිපත් කිරීමට උත්සාහ දරා ඇතැයිද විමර්ශනවලදී අනාවරණවී තිබේ.
ඒ අනුව නීතිවිරෝධි ලෙස අන්සතු ගුවන්ගමන් බලපත්ර තොගයක් තමන් සතුව තබාගැනීම, සාපරාධි සාවද්ය පරිහරණය ඇතුළු චෝදනා කිහිපයක් සම්බන්ධයෙන් වැලිකඩ පොලිසියේ ස්ථානාධිපතිවරයා අද වේයන්ගොඩ පිහිටි ඔහුගේ නිවසේදී අත්අඩංගුවට ගනු ලැබීය.
ඔහු වසර 2ක පමණ කාලයක් වැලිකඩ පොලිසියට අනුයුක්තව සේවය කර ඇති අතර, එම කාලය තුළදී ඔහුගේ ක්රියාකලාපය හේතුවෙන් පොලිස් නිලධාරීන් 20ක් පමණ සේවය හැරගොස් ඇති බවට තොරතුරු වාර්තාවන බව පොලිසිය පැවසීය.
එමෙන්ම අදාළ නිලධාරියා ගම්පහ දිස්ත්රික්කයේ ප්රබල අමාත්යවරයෙකු සිය සමීප හිතවතෙකුයැයි නිතර පවසන බවද වාර්තා වේ.
සිද්ධිය සම්බන්ධ වැඩිදුර විමර්ශන මධ්යම අපරාධ විමර්ශන කාර්යාංශය භාර ජ්යෙෂ්ඨ පොලිස් අධිකාරී කමල් ආරියවංශ මහතාගේ මෙහෙයවීමෙන් ක්රියාත්මකය.
