නිල්වලා ගඟ හරහා ඉදිකර ඇති ලවණ බාධකය හේතුවෙන් වගා කිරීමට නොහැකි වූ මාතර දිස්ත්‍රික්කයේ ගොවීන් වෙත වන්දි මුදල් ගෙවීම එළැඹෙන 27 වැනි දින සිදුකරන බව කෘෂිකාර්මික හා ගොවිජන රක්ෂණ මණ්ඩලය පවසයි.
මාතර දිස්ත්‍රික්කයේ පානීය ජලයට කරදිය එකතුවීම වැළැක්වීම සඳහා ජාතික ජල සම්පාදන හා ජල ප්‍රවාහන මණ්ඩලය විසින් 2019 වර්ෂයේ නිල් වලා ගඟ ආශ්‍රිතව විශේෂ ව්‍යාපෘතියක් ලෙස කරදිය බාධකයක් ඉදිකිරීමට කටයුතු කරන ලදී.
එම කරදිය බාදකය හේතු කොට ගෙන 2019 වර්ෂයෙන් පසු සෑම වර්ෂයකම වර්ෂාව හේතුවෙන් ජල ගැලීම් ඇති වී වගා හානි වාර්තා වී ඇති අතර විශේෂයෙන්, මාතර දිස්ත්‍රික්කයේ මඩිහගොඩගම, කැකණදුර, කඹුරුපිටිය, මාලිම්බඩ, මැදඋයන්ගොඩ ගොවිජන සේවා බල ප්‍රදේශ ඇතුළුව සෙසු ප්‍රදේශ තුළ පිහිටි වගා බිම් මෙලෙස වගා කිරීමට නොහැකි තත්වයට පත් වී ඇත.
මෙම ගැටලුවට අදාළව ගොවීන් සහ ගොවි සංවිධාන විසින් අඛණ්ඩව අදාළ ආයතන දැනුවත් කර ඇති අතර ඒ අනුව, 2019 වර්ෂයේ සිට 2022 වර්ෂය දක්වා අනුක්‍රමික කන්න 07 ක් සඳහා වන්දි ගෙවීම වෙනුවෙන් අමාත්‍ය මණ්ඩල අනුමැතිය ලැබී තිබේ.
මේ අනුව, 2019 යල කන්නය, 2019/20 මහ කන්නය, 2020 යල කන්නය, 2020/21 මහ කන්නය, 2021 යල කන්නය, 2021/22 මහ කන්නය, 2022 යල කන්නය යන වගා කන්නයන් තුල වගා කිරීමට නොහැකි වූ වගා බිම සඳහා වන්දි මුදල් නිදහස් කිරීමට කටයුතු කරන බව එම මණ්ඩලය සඳහන් කළේය.
ඒ අනුව, ගොවි ජනතාවගේ ඉල්ලීම ඉටු කරමින් 2026 වර්ෂයේ ජාතික අයවැය මගින් රුපියල් මිලියන 1,200 ක මූල්‍ය ප්‍රතිපාදන, මෙම වගා කිරීමට නොහැකි වූ වගා බිම් වෙනුවෙන් වන්දි ගෙවීමට රජය විසින් වෙන් කර තිබේ.
මාතර දිස්ත්‍රික් ලේකම් කාර්යාලය, ගොවිජන සංවර්ධන දෙපාර්තමේන්තුව, කෘෂිකර්ම දෙපාර්තමේන්තුව හා කෘෂිකාර්මික හා ගොවිජන රක්ෂණ මණ්ඩලය ඒකාබද්ධව මෙම වන්දි මුදල් ගෙවීමට අවශ්‍යය කටයුතු සිදු කෙරේ.
මෙහිදී, ගොවීන් 5,000 ක් සහ වගා නොකල ඉඩම් අක්කර 12,800 ක ප්‍රමාණයක් වෙනුවෙන් වන්දි මුදල් ලබා දෙන අතර ආරම්භයක් ලෙස එළැඹෙන 27 දින මාතර, මාලිම්බඩ ප්‍රාදේශීය සභා ශ්‍රවණාගාරයේදී ජනාධිපතිවරයාගේ ප්‍රදානත්වයෙන් තෝරා ගත් ගොවීන් 250 ක් සඳහා සංකේතවත් වන ලෙස වන්දි මුදල් ලබා දීමට නියමිත අතර අනෙකුත් සියලු වන්දි හිමි ගොවීන් සඳහා ඉදිරි දින 14 ඇතුලත අදාළ වන්දි මුදල් ලබා දීමට කටයුතු කරන බවද කෘෂිකාර්මික හා ගොවිජ රක්ෂණ මණ්ඩලය සඳහන් කළේය.
