අමෙරිකානු රාජ්‍ය ලේකම් සහ ඉන්දීය අගමැති අතර හමුවක්

දින තුනක ඉන්දීය සංචාරයක නිරත වන අමෙරිකානු රාජ්‍ය ලේකම් මාර්කෝ රුබියෝ නව දිල්ලියේදී අග්‍රාමාත්‍ය මෝදි හමුවී තිබේ.

එහිදී ආරක්ෂාව, වෙළඳාම සහ බටහිර ආසියාවේ පිරිහෙමින් පවතින තත්ත්වය ඇතුළු කරුණු රැසක් පිළිබඳව සාකච්ඡා සිදුකර තිබේ.

පවත්නා ඉරාන ගැටුම් හේතුවෙන් ඉන්දියාවේ බලශක්ති අවශ්‍යතා විවිධාංගීකරණය කිරීම සඳහා වන ප්‍රධාන විසඳුමක් ලෙස අමෙරිකානු බලශක්ති අපනයන ඉහළ නැංවීමට අමෙරිකානු රාජ්‍ය ලේකම් මාර්කෝ රුබියෝ මෙහිදී යෝජනා කර ඇත. 

ඒ අග්‍රාමාත්‍ය නරේන්ද්‍ර මෝදි සමඟ පැවැති ඉහළ මට්ටමේ සාකච්ඡාවලදීය.

ඉන්දියාවේ බලශක්ති ආනයනය පිළිබඳව සඳහන් කරමින් රුබියෝ කියා සිටියේ, "අපට මීට වඩා යමක් කිරීමට හැකි විය යුතුයි. ඒ සඳහා අපි දැනටමත් ඔවුන් සමඟ සාකච්ඡා කරමින් සිටිනවා. අපට අවශ්‍යයි ඔවුන්ගේ බලශක්ති සැපයුම් තුළ අප ප්‍රධාන කොටස්කරුවෙකු වීමට" යනුවෙනි.

මෑත වසරවලදී එක්සත් ජනපදය සිය තෙල් හා ගෑස් නිෂ්පාදනය වේගයෙන් ඉහළ නංවා ඇති බැවින්, ඉන්දියාව වැනි ප්‍රධාන පාරිභෝගික රටවල් වෙත තම අපනයන ඉහළ නැංවීමට වොෂින්ටනය මේ වන විට උත්සාහ කරමින් සිටී.