මස්කෙළිය ප්‍රදේශයේ අද (21) ධාවනය කළ වාහන 28ක් දින 30කට තාවකාලිකව ධාවනයෙන් ඉවත් කිරිමට පියවර ගත් බව නුවරඑළිය දිස්ත්‍රික් ප්‍රධාන මෝටර් රථ පරික්ෂක ජාලිය බණ්ඩාර මහතා පැවසීය.
නුවරඑළිය දිස්ත්‍රික් ප්‍රධාන මෝටර් රථ පරික්ෂකවරයා, ඇතුළු නිලධාරීන් සහ හැටන් කොට්ඨාශ රථ වාහන අංශයේ නිලධාරීන් මස්කෙළිය පොලීසියේ නිලධාරීන් අද මස්කෙළිය ශ්‍රී පාද මාර්ගයේ, මස්කෙළිය හැටන් මාර්ගයේ, මස්කෙළිය සාමිමලේ මාර්ගයේ සහ අතුරු මාර්ගවල ධාවනය කළ පෞද්ගලික මගී ප්‍රවාහන බස් රථ, කැබ් රථ, ත්‍රී රෝද රථ ඇතුලු වාහන 40ක් පරීක්ෂාවට ලක්කර ඇත.
පරික්ෂා කළ වාහන අතරින් වාහනවල මුල් ආකෘතිය වෙනස් කිරිම, අන්ත්‍රාදායක ලෙස වාහනවල අමතර කොටස් සවි කිරීම සහ වාහනවල තිරිංග පද්ධති නිසිලෙස ක්‍රියාත්මක නොවීම යන චෝදනා යටතේ වාහන 28ක් තාවකාලිකව ධාවනයෙන් ඉවත්
කිරිමට පියවර ගෙන තිබේ.
තාවකාලිකව ධාවනයෙන් ඉවත්කළ එම වාහන දින 30ක ඇතුළත අඩුපාඩුකම් සපුරා සම්පූර්ණයෙන්ම අලුත්වැඩියාකර නැවත පරික්ෂාවකට ඉදිරිපත්කරන තෙක් එම වාහනවල ධාවන බලපත්‍රය මෝටර් රථ පරික්ෂකවරයා භාරයට ගෙන තිබේ.
