වැලිකඩ බන්ධනාගාරයේ සිටි රැඳවියෙක් හදිසියේම මියයයි

වැලිකඩ බන්ධනාගාරයේ සිර දඬුවම් ලබමින් සිටි රැඳවියෙකු හදිසියේ රෝහල්ගත කිරීමෙන් පසු මියගොස් තිබේ.

රැඳවියා බන්ධනාගාරයෙන් පලාගොස් ඇති අතර නිලධාරීන් දැඩි පරිශ්‍රමයක් දරා ඔහු යළි රැගෙන විත් ඇති බව පැවසේ.

රැඳවියාගේ පවුලේ ඥාතීන් චෝදනා කරන්නේ බන්ධනාගාර නිලධාරින් ඔහුට අමානුෂික ලෙස පහරදී ඇති බවය.

මත්ද්‍රව්‍ය චෝදනාවකට අදාළව සිර දඬුවම් ලබා වැලිකඩ බන්ධනාගාරයේ සිටි සිරකරුවෙකු එහි නිලධාරින් ඊයේ (03) පස්වරුවේ බන්ධනාගාර අභ්‍යන්තර එළිමහන් ක්‍රීඩාංගණය වෙත රැගෙන ගොස් තිබුණේ එය සුද්දපවිත්‍ර කර ගැනීම සඳහාය.

ඒ අතරතුර සිරකරු එක්වරම පලාගොස් තිබේ.

පලාගිය සිරකරු වහාම ලුහුබැඳ ගිය බන්ධනාගාර නිලධාරින් බොරැල්ල ප්‍රදේශයේදී ඔහු අල්ලාගෙන ඇත්තේ මහත් පරිශ්‍රමයක් දැරීමෙන් පසුවය.

එහිදී රැඳවියා හා නිලධාරීන් අතර පොරබැදීමක් සිදුවූ බව වාර්තා වේ.

සිරකරු යළි බන්ධනාගාරයට රැගෙන විත් සුළු වේලාවකට පසු නැවතත් යම් සිදුවීමක් සිදුව ඇති බව බන්ධනාගාර ආරංචි මාර්ග පවසයි.

ඊට හේතුව තවමත් අනාවරණ නොවන අතර එම සිදුවීමෙන් පසු දැඩිලෙස රෝගාතුර වූ බව කියන සිරකරු බන්ධනාගාර රෝහලට ඇතුළත් කෙරුණු බව සඳහන් වේ.

රෝහලට ඇතුළත් කිරීමෙන් අනතුරුව සැකකරු එහිදී මියගොස් තිබේ.

මියගොස් ඇත්තේ බොරැල්ල ප්‍රදේශයේ පදිංචි වයස අවුරුදු 40ක පමණ වන ආර්.ඕෂධ සංජීව නැමැති පුද්ගලයෙකි.

මොහු මත්ද්‍රව්‍ය මිලිග්‍රෑම් 110ක පමණ ප්‍රමාණයක් සන්තකයේ තබාගැනීමේ සිදුවීමකට දඩයක් නියම වූ අයෙක් වන අතර රුපියල් 5,000ක එම දඩය ගෙවීමට නොහැකි වීම මත මාස තුනක සිරදඬුවම් නියම වූ අයෙක් බව වාර්තා වේ.

සිද්ධිය සම්බන්ධයෙන් මේ වන විට 10 දෙනෙකුගෙන් පමණ ප්‍රකාශ සටහන් කරගෙන ඇති අතර බොරැල්ල පොලීසියේ විශේෂ විමර්ශන කණ්ඩායම් දෙකක් මගින් විමර්ශන ක්‍රියාත්මකය.

මේ අතර ජීවිතක්ෂයට පත් රැඳවියාගේ ඥාතින් පිරිසක් සිද්ධිය සම්බන්ධයෙන් ප්‍රකාශ ලබාගැනීම සඳහා බොරැල්ල පොලීසියට අද (04) කැඳවා තිබුණි.

ඉකුත් අප්‍රේල් 27 වෙනිදා ද මැගසින් බන්ධනාගාරය තුළදී බන්ධනාගාර නියාමකවරයෙක් සමග ඇති වූ පොරබැදීමකින් රැඳවියෙක් මියයාමේ සිදුවීමක් වාර්තා විය.

මෙම මරණය වාර්තා වන්නේ පෙර සිදුවීමේ විමර්ශන ද ක්‍රියාත්මක වෙමින් ඇති පසුබිමකය.