ශ්‍රී ලංකාවේ පාකිස්තාන ඉස්ලාමීය ජනරජයේ මහ කොමසාරිස්, මේජර් ජෙනරාල් (විශ්‍රාමික) නයියර් නසීර් මහතා අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය හමු වී තිබේ.
'දිට්වා' සුළි කුණාටුවෙන් පසුව පාකිස්තාන රජය ශ්‍රී ලංකාව වෙත ලබාදුන් අඛණ්ඩ සහයෝගය සහ සහාය පිළිබඳව අග්‍රාමිත්‍යතුමිය මෙහිදී කෘතඥතාව පළ කළාය.
ගෞරවය, මිත්‍රත්වය සහ පොදු අභිලාෂයන් මත පදනම් වූ ශ්‍රී ලංකාව සහ පාකිස්තානය අතර පවතින දිගුකාලීන සහ සුහද සබඳතා පිළිබඳව දෙපාර්ශවයම මෙහිදී සිහිපත් කර ඇත.
එසේම අධ්‍යාපන, සංචාරක සහ ක්‍රීඩා වැනි ප්‍රධාන ක්ෂේත්‍රයන්හි සහයෝගීතාව තවදුරටත් ශක්තිමත් කිරීමේ වැදගත්කම පිළිබඳවද මෙහිදී අවධානය යොමු වූ අතර ද්විපාර්ශ්වික සබඳතා ශක්තිමත් කිරීමට ශ්‍රී ලංකාවේ ඇති කැපවීම යළි තහවුරු කිරීමත්, දෙරටේ ජනතාව අතර පවතින සබඳතා වර්ධනය කිරීමත් මෙන්ම සහයෝගීතාව සඳහා නව අවස්ථා නිර්මාණය කිරීම ද මෙහි මූලික අරමුණ විය.
මෙම අවස්ථාවට පාකිස්තාන නියෝජ්‍ය මහ කොමසාරිස් සුනෙයිරා ලතීෆ්, අග්‍රාමාත්‍ය ලේකම් ප්‍රදීප් සපුතන්ත්‍රී, අතිරේක ලේකම් සාගරිකා බෝගහවත්ත යන මහත්ම මහත්මීන් සහ විදේශ කටයුතු, විදේශ රැකියා සහ සංචාරක අමාත්‍යාංශයේ නිලධාරීන් පිරිසක් සහභාගී වූහ.
