ගිනිකොණදිග බෙංගාල බොක්ක සහ අන්දමන් මුහුදු ප්‍රදේශ ආශ්‍රිතව නොවැම්බර් 11 වැනිදා පමණ වන විට කැලඹිලි තත්ත්වයක් නිර්මාණය වීමේ හැකියාවක් පවතින බව කාලගුණවිද්‍යා දෙපාර්තමේන්තුව පවසයි.
එම තත්ත්වය නොවැම්බර් 13 වැනිදා පමණ වන විට අඩු පීඩන කලාපයක් බවටත්, ඉන් අනතුරුව නොවැම්බර් 15 වැනිදා පමණ වන විට පීඩන අවපාතයක් බවටත් වර්ධනය වීමේ හැකියාවක් පවතින බව එම දෙපාර්තමේන්තුවේ කාර්යයේ නියුතු කාලගුණ විද්‍යාඥ උදේනි වීරසිංහ මහත්මිය සඳහන් කළාය.
එබැවින් එම මුහුදු ප්‍රදේශවල ධීවර සහ නාවික කටයුතුවල නිරත වන ජනතාව මේ පිළිබඳව විශේෂ අවධානයෙන් කටයුතු කරන ලෙස ද කාලගුණ විද්‍යා දෙපාර්තමේන්තුව දැනුම් දී සිටී.
මේ අතර, අද දිනයේදී ද දිවයිනේ බොහෝ ප්‍රදේශවල පස්වරු 1.00න් පමණ පසුව වැසි හෝ ගිගුරුම් සහිත වැසි ඇතිවීමේ හැකියාව පවතින බව එම දෙපාර්තමේන්තුව සඳහන් කරයි.
බස්නාහිර, සබරගමුව සහ මධ්‍යම පළාත්වලත්, ගාල්ල, මාතර සහ කුරුණෑගල දිස්ත්‍රික්කවලත් ඇතැම් ස්ථානවලට මිලිමීටර් 100 ඉක්මවූ තද වැසි ඇතිවිය හැකි බව ද කාර්යයේ නියුතු කාලගුණ විද්‍යාඥ උදේනි වීරසිංහ මහත්මිය පවසයි.
උදෑසන කාලයේදී ද වැසි ඇතිවීමේ හැකියාව පවතින අතර ගිගුරුම් සහිත වැසි ඇතිවන අවස්ථාවලදී තාවකාලිකව තද සුළං ඇතිවිය හැකි බැවින් අකුණු අනතුරුවලින් ආරක්ෂා වීමට අවශ්‍ය පියවර ගන්නා ලෙස ද ජනතාවගෙන් ඉල්ලා සිටී.
මේ අතර, අද දිනයේදී දිවයින වටා වන මුහුදු ප්‍රදේශවල ද තැනින් තැන වැසි හෝ ගිගුරුම් සහිත වැසි ඇතිවිය හැකිය.
සාමාන්‍යයෙන් සුළඟේ වේගය පැයට කිලෝමීටර් 20ත් 30ත් අතර අගයක් ගනු ඇති නමුත්, ගිගුරුම් සහිත වැසි ඇතිවන අවස්ථාවලදී එම මුහුදු ප්‍රදේශවල තාවකාලිකව පැයට කිලෝමීටර් 60ත් 70ත් අතර වේගයකින් තද සුළං හැමිය හැකි බව ද ඇය වැඩිදුරටත් සඳහන් කළාය.
එබැවින් මුහුදු ප්‍රදේශවල කාලගුණික තත්ත්වය පිළිබඳව අවධානයෙන් පසුවන ලෙස ධීවර හා නාවික ප්‍රජාවට දැනුම් දී තිබේ.
