වැඩිමිලට කීරි සම්බා වික්ක අක්කරේපත්තුවේ වෙළෙඳසැලකට රු. ලක්ෂයක දඩයක්

කීරි සම්බා සහල් උපරිම සිල්ලර මිලට වඩා වැඩි මුදලකට අලෙවි කිරීම සම්බන්ධයෙන් අක්කරේපත්තුව ප්‍රදේශයේ වෙළෙඳසැලකට රුපියල් 100,000ක දඩයක් නියම කර තිබේ.

අක්කරපත්තුව මහේස්ත්‍රාත් අධිකරණය විසින් එම නියෝගය ලබාදුන් බව පාරිභෝගික කටයුතු පිළිබඳ අධිකාරිය පවසයි.

ගැසට් නිවේදන අනුව කීරි සම්බා සහල් කිලෝ 1ක උපරිම සිල්ලර මිල රුපියල් 260ක් ලෙස නියම කර තිබුණද, අදාළ වෙළෙඳසැල විසින් කිලෝ 2ක් රුපියල් 800කට, එනම් කිලෝ එකක් රුපියල් 400 බැගින් අලෙවි කර ඇති බව අනාවරණය විය.

මෙම වැටලීම පාරිභෝගික කටයුතු පිළිබඳ අධිකාරිය අම්පාර දිස්ත්‍රික් කාර්යාලයේ නිලධාරීන් විසින් සිදු කර ඇති අතර, අධිකරණයට කරුණු වාර්තා කිරීමෙන් අනතුරුව වරද පිළිගත් වෙළෙඳසැල් හිමිකරුට මෙම දඩ මුදල නියම කර ඇත.