මුහුදුබඩ දුම්රිය මාර්ගයේ වත්මන් තත්ත්වය මෙන්න

පීලි පැනීමකට ලක්වූ සාගරිකා දුම්රිය පීලිගත කිරීමේ කටයුතු මේ වන විට ආරම්භ කර ඇති බව දුම්රිය දෙපාර්තමේන්තුව පවසයි.

බෙලිඅත්තේ සිට මරදාන බලා ධාවනය වෙමින් තිබූ සාගරිකා දුම්රිය අද (24) උදෑසන පීලි පැනීමකට ලක්ව තිබුණේ වාද්දුව දුම්රිය ස්ථානය ආසන්නයේදීය.

පීලි පැනීමෙන් දුම්රිය ද්විත්ව මාර්ගයෙන් එක් මාර්ගයකට දැඩි හානි සිදුවිය.

මෙම පීලි පැනීමෙන් අවහිර වූ මුහුදුබඩ දුම්රිය මාර්ගයේ ධාවන කටයුතු කොළඹ සිට පානදුර දුම්රිය ස්ථානය දක්වා ක්‍රියාත්මක කිරීමට දුම්රිය දෙපාර්තමේන්තුව මේ වන විට පියවර ගෙන තිබේ.

එතැන් සිට ශ්‍රී ලංකා ගමනාගමන මණ්ඩලයට අයත් බස් රථ යොදා ගනිමින් දුම්රිය මගීන් දකුණු කළුතර දුම්රිය ස්ථානය දක්වා ප්‍රවාහනය කරනු ඇති බවත් එතැන් සිට මාතර හා බෙලිඅත්ත දක්වා දුම්රිය ධාවනය සිදු කිරීමටත් පියවර ගෙන ඇති බවද එම දෙපාර්තමේන්තුව පැවසීය.

තවද බෙලිඅත්ත සිට අනුරාධපුර දක්වා ධාවනය වන රජරට රැජින දුම්රියේ මගීන් සඳහා දුම්රිය දකුණු කළුතර දුම්රිය ස්ථානයට පැමිණි පසු බස් රථ මගින් පානදුර දුම්රිය ස්ථානය දක්වාත් පානදුර සිට දුම්රියක් මගින් අනුරාධපුරය දක්වාත් ගමන් පහසුකම් සලසා ඇති බවද එම දෙපාර්තමේන්තුව පැවසීය.

එමෙන්ම අද සවස් කාලය ගතවිමට පෙර දුම්රිය මාර්ගයේ අවහිරයන් ඉවත් කර එක් මාර්ගයක් දුම්රිය ධාවනය සඳහා යෙදවීමට අවශ්‍ය පියවර ගනිමින් සිටන බවද පස්වරු 6.25න් පසු මුහුදුබඩ මාර්ගයේ දුම්රිය ධාවනය පවතින තත්ත්වය සැලකිල්ලට ගෙන සාමාන්‍ය පරිදි සිදුකිරීමට සැලසුම් කර ඇති බවත්  දුම්රිය දෙපාර්තමේන්තුව සඳහන් කළේය.