කොටියෙකුගේ සපාකෑමකින් අපවත් වූ විදෙස් හිමියෝ ගැන තවත් කරුණු

කොටියෙකුගේ සපාකෑමක් හේතුවෙන් අපවත්වී වදාළ පානම, බඹරගස්තලාව ආරන්‍ය සේනාසනයේ භාවනා යෝගීව වැඩවාසය කළ හිමිනම ගැන තවත් කරුණු හෙළිවී තිබේ.

මෙලෙස අපවත්වී ඇත්තේ වයස අවුරුදු 43ක් වූ චෙක් ජාතික හිමිනමක්වන අතර, උන් වහන්සේ මෙම සිද්ධියට ඊයේ (26) උදෑසන මුහුණ දී ඇති බව සඳහන්ය.

මෙරට හිමිවරු දෙනමක් සමග අපවත්වූ හිමිනම වසරක කාලයක සිට කුඩුම්බිගල සහ බඹරගස්තලාව ඓතිහාසික පුදබිම්වල භාවනායෝගිව වැඩවිසූ බව කුඩුම්බිගල ආරණ්‍ය සේනාසනාධිපති පැල්වත්තේ බුද්ධවංශ හිමියෝ පැවසූහ.

අපවත්වූ හිමි නම 2021 වසරේදී කුඩුම්බිගල ආරණ්‍ය සේනාසනයට වැඩමවා, මාසයක් කාලයක් එහි සිට යළි සිය රට බලා පිටව ගොස් තිබේ.

පසුව යළිත් 2025 වසරේ ජනවාරි මස 20 වෙනි දින ලංකාවට වැඩම කර බඹරගස්තලාව ආරණ්‍ය සෙනසුනේ වැඩ සිටි බවද උන් වහන්සේ සඳහන් කළහ.

අපවත්වූ හිමියන් නන්ද ලෙස හැදින්වූ බවද සඳහන්ය.

මේ වනවිට පානම පොලිස් ස්ථානයේ නිලධාරින් සහ වනජීවි නිලධාරින් එම ස්ථානයට ගොස් ඇති අතර, මරණ පරික්ෂණයෙන් පසුව දේහය පශ්චාත් මරණ පරික්ෂණය සඳහා අම්පාර මහ රෝහල වෙත රැගෙන ඒමට නියමිතය.

සිද්ධිය සම්බන්ධයෙන් පානම පොලිස් ස්ථානය වැඩිදුර විමර්ශන සිදුකරනු ලබයි.