අන්තර්ජාලය අනිසි ලෙස භාවිතා කළ ඉරානයේ පුද්ගලයින් 466ක් අත්අඩංගුවට

අන්තර්ජාලය අනිසි ලෙස භාවිත කර රටෙහි අස්ථාවරත්වයක් ඇති කිරීමට උත්සාහ කළ බවට චෝදනා කරමින් ඉරාන පොලීසිය පුද්ගලයින් 466 දෙනෙකු අත්අඩංගුවට ගෙන ඇති බව විදෙස් වාර්තා පවසයි.

අන්තර්ජාලය භාවිතා කරමින් මහජනතාව බිය ගැන්වීම, සමාජය තුළ නොසන්සුන්තා ඇති කිරීම සහ මානසික අනාරක්ෂිතභාවයක් ඇති කිරීම මොවුන්ට එල්ල වී ඇති ප්‍රධාන චෝදනා වේ.

සතුරු පාර්ශවයන්ට පක්ෂපාතීව කටයුතු කිරීම සහ ආරක්ෂාවට තර්ජනයක් වන ක්‍රියාවන් සඳහා පුද්ගලයින් මෙහෙයවීම සම්බන්ධයෙන්ද මොවුන්ට චෝදනා එල්ල වී ඇත.

ඉරානයේ පවතින අන්තර්ජාල බාධාවන් මධ්‍යයේ රජයේ පාලනය තවදුරටත් දැඩි කිරීම සඳහා මෙම පියවර ගෙන ඇති බව වැඩිදුරටත් සඳහන් වෙයි.