යාපනයේ බෝට්ටු අනතුර සම්බන්ධව කඩිනම් පරීක්ෂණයක් පවත්වන ලෙස නියෝග
March 6, 2026 03:29 pm
යාපනය ගුරුනගර් තොටුපොළේදී අද (06) පෙරවරුවේ සිදුවූ බෝට්ටු අනතුර සම්බන්ධව කඩිනම් පරීක්ෂණයක් පවත්වා වාර්තාවක් ඉදිරිපත් කරන ලෙස ධීවර, ජලජ හා සාගර සම්පත් අමාත්ය රාමලිංගම් චන්ද්රසේකර් මහතා යාපනය දිස්ත්රික් ධීවර දෙපාර්තමේන්තුව වෙත නියෝග කර තිබේ.
අනතුර සඳහා බලපෑ මූලික හේතු සෙවීම වෙනුවෙන් නාවික හමුදාව ඇතුළු සියලුම අංශ සම්බන්ධ කරගනිමින් මෙම පරීක්ෂණ කඩිනමින් පවත්වන ලෙසද අමාත්යවරයා අදාළ බලධාරීන්ට උපදෙස් ලබා දී ඇත.
අනතුරට ලක්වූ බෝට්ටුවේ ධාවන යෝග්යතාව, මගීන් සංඛ්යාව, නියමිත සීමාවන් ඉක්මවා තිබුණේද යන්න සහ මුහුදු ගමන් සඳහා වන ආරක්ෂිත ක්රියා පටිපාටි නිසි ලෙස අනුගමනය කළේද යන්න සම්බන්ධවද සවිස්තරාත්මක වාර්තාවක් කැඳවීමටද අමාත්යවරයා පියවර ගෙන තිබේ.
අනතුරින් මුහුදේ අතරමංවූවන් සෙවීමේ සහ ගලවා ගැනීමේ කටයුතු ප්රමාදයකින් තොරව පවතින සියලු සම්පත් භාවිත කරමින් කඩිනම් ලෙස සිදු කිරීමටද උපදෙස් ලබා දී ඇති අමාත්යවරයා, අනතුරින් පීඩාවට පත්ව රෝහල් ගත කර සිටින පුද්ගලයින්ගේ සෞඛ්ය තත්ත්වය පිළිබඳවද රෝහල් බලධාරීන්ගෙන් විමසීමක්ද සිදුකර තිබේ.
ඒ අනුව ඔවුන්ට අවශ්ය උපරිම වෛද්ය පහසුකම් සපයන ලෙසද අමාත්යවරයා විසින් රෝහල් බලධාරීන්ට දන්වා ඇති බවද ධීවර අමාත්යාංශය සඳහන් කළේය.
එමෙන්ම අනතුරින් ජීවිත අහිමිවූන්ගේ පවුල් වෙත සිය ශෝකය පළ කළ අමාත්යවරයා ඔවුන්ට අවශ්ය සියලු සහන ලබා දීමටද කටයුතු කරන ලෙසද අදාළ බලධාරීන්ට දන්වා තිබේ.
