ව්‍යසන කළමනාකරණය සඳහා වූ ජාතික සභාවේ 16 වන සභා වාරයේ ප්‍රගති සමාලෝචන රැස්වීම අද (26) පෙරවරුවේ ජනාධිපති කාර්යාලය හිදී පැවැත්වුණි.
ජනාධිපති ලේකම් නන්දික සනත් කුමානායක මහතාගේ ප්‍රධානත්වයෙන් එම රැස්වීම පැවැති බව ජනාධිපති මාධ්‍ය අංශය සඳහන් කරයි.
‘දිට්වා’ සුළි කුණාටුවෙන් විපතට පත් ජනතාවට සහන සැලසීමේ ක්‍රියාවලියේදී වගකීම් දරන ආයතන අතර ඒකාබද්ධතාවය අත්‍යවශ්‍ය බව මෙහිදී ජනාධිපති ලේකම්වරයා පෙන්වා දුන් බව සඳහන් වේ.
එක් එක් ආයතනවලට වෙන වෙනම කාර්යභාර සහ සැලසුම් පැවතියද, ඒවා සම්බන්ධීකරණය කර එක් යාන්ත්‍රණයක් ලෙස ක්‍රියාත්මක වීම තුළින් ආපදා කළමනාකරණ හා සහන කටයුතු වඩාත් කාර්යක්ෂම හා සාර්ථකව ඉටු කළ හැකි බව ඔහු අවධාරණය කළේය.
නිවැරදි තොරතුරු හුවමාරු කර ගැනීම සහ විශ්වාසනීය දත්ත පදනම් කරගනිමින් තීරණ ගැනීම තුළින් පීඩාවට පත් ජනතාවට සහන සැලසීම කඩිනම් කළ හැකි බවද ජනාධිපති ලේකම්වරයා පෙන්වා දුන්නේය.
ආපදාවට ලක්වූ හා අවදානම් සහිත ප්‍රදේශවල ජීවත් වන ජනතාව වෙනුවෙන් නව නිවාස ඉදිකිරීම සඳහා සුදුසු ඉඩම් හඳුනාගෙන, ජාතික ගොඩනැගිලි පර්යේෂණ සංවිධානය මගින් සිදු කරන පරීක්ෂණ හා නිර්දේශ අනුව කඩිනමින් නිවාස ඉදිකිරීම සම්බන්ධයෙන්ද මෙහිදී සාකච්ඡා කෙරිණි.
නිවාස ඉදිකිරීමේ වැඩපිළිවෙළ කඩිනමින් අවසන් කිරීම සඳහා අත්‍යවශ්‍ය සේවා කොමසාරිස්වරයා සමඟ විශේෂ සාකච්ඡාවක් පැවැත්වීමටද තීරණය විය.
ආපදාවට පත් ජනතාවට ගෙවනු ලබන වන්දි මුදල් හා වෙනත් දීමනා කඩිනමින් ගෙවා අවසන් කරන ලෙසත්, දීමනා නොලැබූ ජනතාවගේ අභියාචනා පිළිබඳ විශේෂ අවධානයක් යොමු කරන ලෙසත් ජනාධිපති ලේකම්වරයා නිලධාරීන්ට උපදෙස් ලබා දී තිබේ.
මෙම අවස්ථාවට ආරක්ෂක ලේකම් එයාර් වයිස් මාර්ෂල් (විශ්‍රාමික) සම්පත් තුයියකොත්තා, නිවාස ඉදිකිරීම් හා ජලසම්පාදන අමාත්‍යාංශයේ ලේකම් කුමුදුලාල් බෝගහවත්ත, ජනාධිපති ජ්‍යෙෂ්ඨ අතිරේක ලේකම් කපිල ජනක බණ්ඩාර, ආපදා කළමනාකරණ අංශයේ අතිරේක ලේකම් කේ.ජී. ධර්මතිලක, කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක, ජාතික ආපදා සහන සේවා මධ්‍යස්ථානයේ ජ්‍යෙෂ්ඨ සහකාර ලේකම් නාමල් ලියනගේ, ජාතික ගොඩනැගිලි පර්යේෂණ සංවිධානයේ අධ්‍යක්ෂ ජනරාල් ආසිරි කරුණානායක සහ ආපදා කළමනාකරණ මධ්‍යස්ථානයේ අධ්‍යක්ෂ ජනරාල් මේජර් ජනරාල් (විශ්‍රාමික) සම්පත් කොටුවේගොඩ යන මහත්වරු ඇතුළු රජයේ ආයතන නියෝජිතයින් එක්ව සිටියහ.
