ඉන්දියානු ශාස්ත්‍රීය නර්තන හා සංගීතය ප්‍රථම වරට ශ්‍රී ලාංකීය ජනතාවට ඉදිරිපත් කරන ප්‍රසංගයක් එළැඹෙන මාර්තු 04 සහ 05 කොළඹදී පැවැත්වීමට නියමිතව තිබේ.
"පරම්පරා" යනුවෙන් නම් කර ඇති මෙම ප්‍රසංගය එම දෙදින තුළ කොළඹ ලයනල් වෙන්ඩ්ට් කලාගාරයේදී පස්වරු 6.00ට ආරම්භ වීමට නියමිතව ඇත.
මෙම ප්‍රසංගය සම්බන්ධව අදහස් දක්වමින් ප්‍රසංගයේ නිර්මාතෘ ප්‍රවීණ භරත නාට්‍යම් ශිල්පිනියක් වන ප්‍රීති ගනේගොඩ මහත්මිය පැවසුවේ මෙම ප්‍රසංගය සඳහා පැමිණෙන ඉන්දීය නර්තන ශිල්පීන් සිය වියදමින්ම ප්‍රසංගය සඳහා සහභාගී වීමට මෙරටට පැමිණෙන බවය.
මාර්තු 04 වැනිදා පැවැත්වෙන මහෝත්සවයේදී ඉන්දියානු ශාස්ත්‍රීය නර්තන ශෛලීන් ශ්‍රී ලාංකීය ප්‍රවීණ ශිල්පීන් සහ භාරතීය ශිල්පීන් විසින් රඟ දක්වනු ලබන අතර එය "නට" මහෝත්සවය යනුවෙන් නම් කර තිබේ.
ප්‍රීති ගනේගොඩ මහත්මිය යනු මෙරට සිංහල භාෂාවෙන් භරත නාට්‍ය සම්බන්ධව ග්‍රන්ථයක් රචනා කළ පළමු සහ එකම කර්තෘවරියද වේ.
ඇයට අමතරව මෙම ප්‍රසංගය සඳහා ප්‍රවීණ උඩරට නර්ථන සහ කථකලි නර්තන ශිල්පී ආචාර්ය රවිබන්ධු විද්‍යාපති , සමන්තා විද්‍යාපති සහ චන්දන වික්‍රමසිංහ උපදේශන කමිටුවේ සාමාජිකයන් ලෙස කටයුතු කරනු ඇත.
ප්‍රීති ගනේගොඩ මහත්මිය පැවසුවේ කෙසේ වෙතත් මෙම ප්‍රසංගය සඳහා රජය හෝ සංස්කෘතික අමාතයාංශය හෝ වෙනත් කිසිදු පාර්ශ්වයක් අනුග්‍රහයක් ලබා නොදුන් නමුත් ශ්‍රී ලංකාවේ ඉන්දියානු මහ කොමසාරිස් කාර්යාලය තම ඉන්දීය උරුමයන් දිගහැරෙන ලාංකීය වේදිකාව වෙනුවෙන් ලබා දිය හැකි උපරිම සහයෝගය ලබා දුන් බවය.
එමෙන්ම මෙම වසරින් පසුව මෙම ප්‍රසංගය වාර්ෂිකව පැවැත්වීමටද තමන් අදහස් කරන බව ඇය මෙහිදී පැවසුවාය.
මෙම ප්‍රසංගය සම්බන්ධව අදහස් දක්වමින් ආචාර්ය රවි බන්දු විද්‍යාපති මහතා සඳහන් කළේ මෙහි ඉදිරිපත් කෙරෙන ඇතැම් නර්තන ශෛලීන් අද වන විට ඉන්දියාවෙන් පවා දුරස්ව යන බවත් එය ශ්‍රී ලංකාවේ පවා දක්නට නොමැති බවය.
ඒ අනුව මෙම ප්‍රසංගයේ වටිනාකම මිල කළ නොහැකි බවද ඒ මහතා ප්‍රසංගය සම්බන්ධව වැඩිදුරටත් අදහස් දක්වමින් පැවසීය.
මෙම ප්‍රසංගය සම්බන්ධව වැඩිදුර විස්තර දැන ගැනීමට අවශ්‍ය වේ නම් දුරකථන අංක 077 888 1540 හෝ 0777872527 යන දුරකථන අංක ඇමතීමෙන් ලබා ගත හැකි බවද ඔවුන් සඳහන් කළේය.
