ට්රම්ප්ගෙන් සියයට 10ක නව ගෝලීය බද්දක්
February 21, 2026 06:49 am
අමෙරිකානු ජනාධිපති ඩොනල්ඩ් ට්රම්ප් විසින් ගෝලීය ආනයන සඳහා 10%ක නව බද්දක් ඊයේ (21) ප්රකාශයට පත් කළේය.
ට්රම්ප්ගේ බදු ප්රතිපත්තියට එරෙහිව ශ්රේෂ්ඨාධිකරණය ලබාදුන් තීන්දුවෙන් පසු ඔහු විසින් වහාම ක්රියාත්මක වන මෙම නව බද්ද පනවා ඇත.
අමෙරිකානු ජාතිය විමුක්තිය ලැබීමේ දිනය ලෙස නම් කරමින් රටවල් රැසක් ආවරණය වන පරිදි අන්යෝන්ය ගෝලීය තිරු බදු ප්රකාශයට පත් කිරීමට අමෙරිකානු ජනාධිපති ඩොනල්ඩ් ට්රම්ප් පියවර ගත්තේ පසුගිය වසරේ අප්රේල් 2වනදාය.
සිය දෙවැනි ධුරකාලයේ රාජකාරි ආරම්භ කර මාස දෙක හමාරක් වැනි කෙටි කාලයක් ඇතුළත ඔහු මෙම බදු පැනවීම සිදුකර තිබුණේ 1977 ජාත්යන්තර හදිසි ආර්ථික බලතල පනතින් ලබා දී ඇති බලතල යටතේ බව පවසමින්ය.
එම බදු යෝජනා ක්රමය යටතේ විවිධ රටවලට 10% සිට 50% දක්වා නව තීරුබදු ප්රකාශයට පත් කෙරුණු අතර, පසුව විවිධ රටවල් අමෙරිකාව සමග ගොඩනගා ගත් වෙළෙඳ එකඟතා මත ඒ ඒ රටවලට පැනවූ බදු ප්රතිශතයන් සංශෝධනය කිරීමට ට්රම්ප් පරිපාලනය පියවර ගත්තේය.
මෙවන් පසුබිමක, ගෝලීය වෙළෙඳාම තුළ දැඩි ආන්දෝලනයක් ඇති කරමින්, අමෙරිකානු ජනාධිපතිවරයා පැනවූ එම තීරුබදු නීත්යානුකූල නොවන බවට එරට ශ්රේෂ්ඨාධිකරණය තීන්දු කළේය.
රටතුළ ජාතික හදිසි අවස්ථාවකදී භාවිතා කිරීමට පමණක් අවසර ඇති ජාත්යන්තර හදිසි ආර්ථික බලතල පනත, ආනයනික භාණ්ඩ මත බදු පැනවීම සඳහා භාවිතා කිරීම මගින් ට්රම්ප් ජනාධිපතිවරයා සිය බලතල ඉක්මවා ගොස් ඇති බව 6-3ක් ලෙස බෙදුණු තීන්දුව ලබා දෙමින් අගවිනිසුරු ජෝන් රොබර්ට්ස් පවසා ඇත.
මෙම තීන්දුවත් සමග මේ දක්වා එම අතිරේක තීරුබදුවලින් උපයා ගත් ඩොලර් බිලියන 175ක පමණ ආදායමක්, ආපසු ගෙවිය යුතු අවදානමකටද අමෙරිකාවට මුහුණදීමට සිදුවේ.
මෙවන් පසුබිමක මෙම නඩු තීන්දුව සහ ඊට පක්ෂ වූ විනිසුරුවන් දැඩිව විවේචනය කිරීමට ද ජනපති ට්රම්ප් කටයුතු කළේය.
"තීරුබදු සම්බන්ධ ශ්රේෂ්ඨාධිකරණ නඩු තීන්දුව ඉතාම කණගාටුදායක එකක්.
මම ලැජ්ජාවෙනවා අධිකරණයේ සමහර විනිසුරුවන් ගැන සහ රට වෙනුවෙන් නිවැරදි දේ කිරීමට ඔවුන්ට ශක්තිය නොමැති වීම සම්බන්ධයෙන්.
මම ස්තූති කරනවා තෝමස්, අලිතෝ සහ කවනෝෆ් විනිසුරුවරුන්ට.
වසර ගණනාවක් අපේ රට විනාශ කළ විදෙස් රටවල්වලට දැන් ගොඩක් සතුටුයි. ඔවුන් පාරේ නටමින් ඉන්නවා.
නමුත් මම සහතික වෙනවා ඔවුන්ට වැඩි කාලයක් එහෙම කරන්න ලැබෙන්නේ නෑ".
ඔබට ඩොලර් බිලියන 175ක් ආපසු ගෙවන්න වෙනවද?
ට්රම්ප් -
"හොඳ ප්රශ්නයක්. අපි අරගෙන තියෙන්නේ ඩොලර් බිලියන ගණනක්. මිලියන නෙමෙයි. මේ ගැන සඳහනක් වත් නෑ තීන්දුවේ. ඒ නිසා ඒ සම්බන්ධයෙන් අධිකරණයේ වසර ගණනක් නඩු යයි".
මේ අතර ශ්රේෂ්ඨාධිකරණ තීන්දුවත් සම ඊයේ අමෙරිකානු කොටස් වෙළෙඳපොළේ මිල ඉහළ ගොස් තිබුණි.
