විස්සයි20 ලෝක කුසලාන ක්‍රිකට් තරගාවලියේ නේපාලයට එරෙහිව අද (12) පැවති තරගයෙන් කඩුලු 10ක පෙරළිකාර ජයක් ලැබීමට ඉතාලිය සමත් විය.

'C'කාණ්ඩයේ තරගයක් ලෙස මෙය මුම්බායිහි වන්කඩේ ක්‍රීඩාංගණයේදී පැවැත්විණි.

මෙහි පළමුවෙන් පන්දුවට පහරදුන් නේපාලයට පන්දුවාර 19.3කදී සියලු දෙනා දැවී රැස්කළ හැකිවූයේ ලකුණු 123ක් පමණි.

ලකුණු 124ක ඉලක්කයක් හඹාගිය ඉතාලිය කිසිවෙකුත් නොදැවී තරගයේ 13(12.4) වන පන්දුවාරයේදී එම ඉලක්කය පසුකර යෑමට සමත් විය.

ඒ අනුව, ඔවුන් පන්දු 44ක් ඉතිරිව තිබියදී මෙම ජයග්‍රහණය සම්පූර්ණ කරගැනීම සැලකෙන්නේ, විස්සයි20 ලෝක කුසලාන ඉතිහාසයේ ලකුණු 120කට වැඩි ඉලක්කයක් වැඩිම පන්දු සංඛ්‍යාවක් ඉතිරිකර ජයගත් තෙවන අවස්ථාව ලෙසය.

එමෙන්ම මෙය ඉතාලිය ලැබූ පළමු කඩුලු 10ක ජයග්‍රහණය වන අතර, නේපාලය ලැබූ දෙවන කඩුලු 10ක පරාජය වේ.

මෙහි ඉතාලි ආරම්භක පිතිකරු යුගලය ලෙස ක්‍රීඩාකළේ ජස්ටින් මොස්කා සහ ඇන්තනී මොස්කා යන සහෝදරයන් දෙපළ වන අතර, ඔවුන් ගොඩනැගූ ලකුණු 124ක සබඳතාව සැලකෙන්නේ, T20 ලෝක කුසලාන තරගාවලියකදී සහෝදර දෙපළක් ක්‍රීඩාකළ ඉහළම ලකුණු සම්බන්ධතා ලෙසය.

ඔවුන් බිඳහෙලනු ලැබුවේ 2014 ලෝක කුසලානයේ දී කම්රාන් අක්මාල් සහ උමාර් අක්මාල් ඔස්ට්‍රේලියාවට එරෙහිව ගොඩනැගූ ලකුණු 96ක සබඳතාවයයි.