අධ්යාපන සභාවක් ස්ථාපනය සඳහා වූ විද්වත් කමිටු වාර්තාවට අනුමැතිය
February 9, 2026 10:17 pm
යෝජිත අධ්යාපන සභාව ස්ථාපනය සඳහා අධ්යාපන අමාත්යංශය විසින් පත් කෙරුණු විද්වත් කමිටුවේ වාර්තාව, අධ්යාපන සභාව ස්ථාපනය සඳහා වූ පාර්ලිමේන්තු අනු කමිටුව විසින් අනුමත කර තිබේ.
ඒ පසුගිය 06 වනදා අදාළ පාර්ලිමේන්තු අනු කමිටුව, එහි සභාපති, කම්කරු නියෝජ්ය අමාත්ය මහින්ද ජයසිංහ මහතාගේ ප්රධානත්වයෙන් රැස් වූ අවස්ථාවේදීයි.
අධ්යාපන සභාව ස්ථාපනය සඳහා අධ්යාපන අමාත්යංශය විසින් පත් කෙරුණු විද්වත් කමිටුවේ වාර්තාව එම කමිටුවේ සභාපති මහාචාර්ය ඕ.ජී. දයාරත්න මහතා විසින් පසුගිය ඔක්තෝබර් 10 වනදා පැවති සභාවාරය අතරතුර අධ්යාපන සභාව ස්ථාපනය සඳහා වූ පාර්ලිමේන්තු අනු කමිටුවේ සභාපති, කම්කරු නියෝජ්ය අමාත්ය මහින්ද ජයසිංහ මහතා වෙත භාර දී තිබුණි.
එම විද්වත් කමිටු වාර්තාව සම්බන්ධයෙන් අධ්යාපන සභාව ස්ථාපනය සඳහා වූ පාර්ලිමේන්තු අනු කමිටුවේ අදහස් සහ යෝජනා ලබා දීම දැනටමත් සිදුකරමින් පවති.
අදාළ විද්වත් කමිටු වාර්තාව මේ වනවිට සිංහල,දෙමළ සහ ඉංග්රීසි යන භාෂාත්රයෙන් ම මුද්රණය කර ඇති බව සඳහන් කළ මහින්ද ජයසිංහ මහතා එහි පිටපත් සිය කමිටු සාමාජිකයින් වෙත ලබා දීමට කටයුතු කළ බවද ප්රකාශ කළේය.
පසුගිය 06 වනදා රැස් වූ අධ්යාපන සභාව ස්ථාපනය සඳහා වූ පාර්ලිමේන්තු අනු කමිටුව විසින් අධ්යාපන අමාත්යංශ විද්වත් කමිටු වාර්තාව , අධ්යාපන අමාත්යංශ පාර්ලිමේන්තු උපදේශක කාරක සභාවට යොමු කිරීමට තීරණය කර ඇත.
අධ්යාපන අමාත්යංශ පාර්ලිමේන්තු උපදේශක කාරක සභාව ලබන 18 වනදා රැස්වීමට නියමිත අතර එහිදී විද්වත් කමිටුවේ වාර්තාවට අනුමැතිය ලබා ගැනීමට නියමිතය.
එම අනුමැතිය හිමිවීමෙන් පසුව අදාළ කමිටු වාර්තාව සඳහා ගුරු-විදුහල්පති ඇතුළු වෘත්තීය සමිතිවලට මෙන්ම මහ ජනතාවට අදහස් හා යෝජනා ඉදිරිපත් කිරීමට මාසයක කාලයක් හිමිවනු ඇති.
එහිදී ලැබෙන අදහස් හා යෝජනා තුල අන්තර්ගත සාධනීය කරුණුද සම්බන්ධයෙන් අවධානය යොමු කිරීමට අපේක්ෂිත බව සඳහන් වේ.
එලෙස සකස් කෙරෙන වාර්තාව, නීතියක් බවට පත් කිරීම සඳහා ගත යුතු ක්රියාමාර්ග කඩිනමින් සිදුකිරීමට කටයුතු කරන බවද නියෝජ්ය අමාත්ය මහින්ද ජයසිංහ මහතා වැඩිදුරටත් සඳහන් කර තිබේ.
