මාරක අනතුරු කිහිපයක් - ජීවිත 6ක් අහිමි වෙයි
February 3, 2026 08:22 am
දිවයින පුරා ස්ථාන කිහිපයකදී සිදුවු අනතුරුවලින් පුද්ගලයින් 6 දෙනෙකු ජීවිතක්ෂයට පත්ව ඇතැයි පොලීසිය පවසයි.
අද (03) අලුයම දඹුල්ල හබරණ මාර්ගයේ ඉනාමළුව ප්රදේශයේදී ස්විස් හන්දිය දෙසට ධාවනය වූ යතුරුපැදියක් පැදිකරුට පාලනය කරගත නොහැකිව මාර්ගයෙන් ඉවතට පැන විදුලි රැහැන් කණුවක ගැටී අනතුරක් සිදුව ඇත.
අනතුරින් තුවාල ලැබූ යතුරුපැදිකරු දඹුල්ල රෝහලට ඇතුළත් කර ඇති අතර රෝහල් ගතකරන විටත් ඔහු මියගොස් සිට ඇතැයි පොලීසිය පැවසීය.
එලෙස මියගොස් ඇත්තේ, අවුරුදු 22 ක් වූ රොටවැව ප්රදේශයේ පදිංචිකරුවෙකි.
මේ අතර, ඊයේ (02) දහවල් කොළඹ නුවර ප්රධාන මාර්ගයේ නාරම්පිටිගොඩ හන්දිය ප්රදේශයේදී කොළඹ දෙසට ධාවනය වූ යතුරුපැදියක් ප්රතිවිරුද්ධ දෙසින් පැමිණි පුද්ගලික බස් රථයක ගැටී සිදුවු අනතුරකින් යතුරුපැදිකරු තුවාල ලබා මාවනැල්ල රෝහලට ඇතුළත් කිරීමේදී මියගොස් ඇත.
එලෙස මියගොස් ඇත්තේ, 19 හැවිරිදි ගිඟුල ප්රදේශයේ පදිංචි තරුණයෙකි.
අනතුරට සම්බන්ධ බස්රථ රියැදුරු අත්අඩංගුවට ගෙන ඇති අතර, මාවනැල්ල පොලිසිය වැඩිදුර විමර්ශන සිදුකරයි.
ඊයේ දහවල් වාරියපොල හලාවත මාර්ගයේ බංඩාරකොස්වත්ත ප්රදේශයේදී වාරියපොලදෙසට ධාවනය වූ යතුරුපැදියක් ප්රතිවිරුද්ධ දෙසින් පැමිණි ත්රීරෝද රථයක ගැටී අනතුරක් සිදුව ඇති අතර, අනතුරින් යතුරුපැදිකරු තුවාල ලබා වාරියපොල රෝහලට ඇතුළත් කිරීමේදී මියගොස් තිබේ.
එලෙස මියගොස් ඇත්තේ, අවුරුදු 25ක් වූ යහලතැන්න ප්රදේශයේ පදිංචිකරුවෙකි.
අනතුරට සම්බන්ධ ත්රීරෝද රථ රියැදුරු අත්අඩංගුවට ගෙන ඇති අතර, වාරියපොල පොලීසිය වැඩිදුර විමර්ශන සිදුකරයි.
මේ අතර, ඊයේ උදෑසන පුත්තලම ත්රිකුණාමලය මාර්ගයේ මාතලේ හන්දිය ප්රදේශයේදී අනුරාධපුර දෙසට ධාවනය වූ යතුරුපැදියක් මාර්ගය හරහා ගමන් කළ කාන්තාවකගේ ගැටී අනතුරක් සිදුව ඇති අතර, අනතුරින් පදික කාන්තාව සහ යතුරුපැදියේ පසුපැදිකාරිය තුවාල ලබා අනුරාධපුර ශික්ෂණ රෝහලට ඇතුළත් කිරීමේදී පදික කාන්තාව මියගොස් ඇත.
මරණකාරිය වයස අවුරුදු 65ක් වූ අඹන්පොල ප්රදේශයේ පදිංචිකරුවෙකි.
ඊයේ සවස රත්නපුර පානදුර මාර්ගයේ මුණසිංහපුර ප්රදේශයේදී රත්නපුර දෙසට ධාවනය වූ ත්රීරෝද රථයක් රියැදුරුට පාලනය කරගත නොහැකිව ප්රතිවිරුද්ධ දෙසින් පැමිණි ඉන්ධන බවුසරයක ගැටී අනතුරක් සිදුව ඇති අතර, අනතුරින් ත්රීරෝද රථයේ ගමන්ගත් කාන්තාවක් ත්රීරෝද රථයෙන් ඉවතට විසිවී බවුසර් රථයට යටවීමෙන් එම ස්ථානයේදීම මියගොස් ඇත.
ත්රීරොද රථයේ රියැදුරු හා එහි ගමන්ගත් තවත් පුද්ගලයින් තිදෙනෙකු තුවාල ලබා ප්රතිකාර සඳහා රත්නපුර ශික්ෂණ රෝහලට ඇතුළත් කර තිබේ.
එලෙස මියගොස් ඇත්තේ, 20 හැවිරිදි අයගම ප්රදේශයේ පදිංචිකාරියකි.
අනතුරට සම්බන්ධ බවුසර් රථයේ රියැදුරු අත්අඩංගුවට ගෙන ඇති අතර, කිරිඇල්ල පොලීසිය වැඩිදුර විමර්ශන සිදුකරයි.
මේ අතර ඊයේ දහවල් කන්කසන්තුරය පේදුරුතුඩුව මාර්ගයේ ඌරනිය හන්දිය ප්රදේශයේදී කන්කසන්තුරය දෙසට ධාවනය වූ යුද හමුදා ට්රක් රථයක් ප්රතිවිරුද්ධ දෙසින් පැමිණි පාපැදියක ගැටී අනතුරක් සිදුව ඇත.
අනතුරින් 62 හැවිරිදි පාපැදිකාරිය තුවාල ලබා තෙලිප්පලේ රෝහලට ඇතුළත් කිරීමේදී මියගොස් තිබේ.
