ආපදාවලින් මියගිය අයට මරණ සහතික නිකුත් කිරීම ඇතුළු සේවා සැපයීමේ ජංගම සේවාවක්

"දිට්වා" සුළි කුණාටුව හේතුවෙන් ඇති වූ නායයෑම් සහ ගංවතුර නිසා අතුරුදන් වූ පුද්ගලයන් 193 දෙනෙකුගේ මරණ ලියාපදිංචි කිරීමේ සහතික නිකුත් කිරීමට රෙජිස්ට්‍රාර් ජනරාල් දෙපාර්තමේන්තුව තීරණය කර ඇත.

පසුගිය 2 වෙනිදා රජය විසින් නිකුත් කරනු ලැබූ විශේෂ ගැසට් නිවේදනයට අනුව හදිසි ආපදා තත්ත්වයක් හේතුවෙන් අතුරුදන් වූ පුද්ගලයකු සති 2කට පසුවත් යම් තොරතුරක් නොලැබෙන්නේ නම් ඔහුට හෝ ඇයට මරණ ලියාපංචි කිරීමේ සහතිකයක් නිකුත් කෙරෙන බව රෙජිස්ට්‍රාර් ජනරාල් දෙපාර්තමේන්තුව ප්‍රකාශ කළේය.

ඒ අනුව මෙම ආපදා තත්ත්වය නිසා මේ වන විට අතුරුදන්ව ඇති පුද්ගලයින් 203 දෙනෙකු සඳහා රජයෙන් ලබා දෙන වන්දි මුදල් කඩිනමින් ලබාගැනීමේ අරමුණින් මෙම සහතික නිකුත් කිරීමට එම දෙපාර්තමේන්තුව තීරණය කර ඇත. 

ඒ සඳහා අවශ්‍ය නීතිමය විධිවිධාන දැනටමත් ක්‍රියාත්මක කර ඇති  ඇති බවත් මෙම ව්‍යසනය හේතුවෙන් පුද්ගලයකු, ඥාතියෙකු හෝ මිතුරකු අතුරුදන් වී ඇති බවට අදාළ ප්‍රදේශයේ ග්‍රාම නිලධාරීවරයා තහවුරු කරන්නේ නම් එම දිස්ත්‍රික් නියෝජ්‍ය රෙජිස්ටාර් වෙත මරණ ලියාපදි කිරීමේ සහතික නිකුත් කිරීමේ බලය පවරා තිබේ.

ආපදාවට ලක් වූ අතුරුදහන් වු පුද්ගලයා සම්බන්ධයෙන් විරෝධතා මතු නොවන්නේ නම්, ප්‍රාදේශීය ලේකම්වරයා විසින් අනුමැතිය සඳහා අයදුම්පත රෙජිස්ට්‍රාර් ජනරාල් විසින් බලය පවරන ලද ප්‍රාදේශීය නියෝජ්‍ය හෝ සහකාර රෙජිස්ට්‍රාර් ජනරාල්ගේ අදාළ අනුමැතිය අනුමත කරනු ඇත.

මේ අතර, මධ්‍යම පළාතේ පුද්ගලයින් වෙනුවෙන් මරණ සහතික නිකුත් කිරීම, අතුරුදන් වූවන්ගේ මරණ සහතික නිකුත් කිරීම ඇතුළු සේවා සැපයීමේ විශේෂ ජංගම සේවාවක් හෙට (13) සහ අනිද්දා (14) දිනයේ පැවැත්වීමට නියමිතව තිබේ.

මධ්‍යම පළාත් නියෝජ්‍ය රෙජිස්ටාර් ජනරාල් තරංගා සුභාෂිණී මහත්මිය සඳහන් කළේ, එම සියලු සේවා එම අවස්ථාවේ දීම නොමිලේ සිදුකර දීමට පියවර ගෙන ඇති බවය. 

හානියට පත් වූ විවාහ, උප්පැන්න සහ මරණ සහතික පිටපත් ලබා දීම ද මෙම ජංගම සේවාව හරහා සිදුකිරීමට නියමිතය.

ඒ අනුව හෙට (13) දිනයේ දී ජංගම සේවය පැවැත්වෙන ස්ථානය පහතින් දැක්වේ.

උඩහේන්තැන්න, අංක 1, දෙමළ මහා විද්‍යාලය, පරගල ජනපදයේ උදෑසන 9 සිට.

වැඩි විස්තර - 0812224470

අනිද්දා (14) දිනයේ දී ජංගම සේවය පැවැත්වෙන ස්ථානය පහතින් දැක්වේ.

ප්‍රාදේශීය ලේකම් කාර්යාලය -දොළුව උදෑසන 9 සිට

වැඩි විස්තර - 0812224470