හානි වූ ඇළ මාර්ග කඩිනමින් යථා තත්ත්වයට පත් කර කුඹුරු වෙත ජලය නිදහස් කිරීමට පියවර

දිට්වා සුළි කුණාටුවත් සමග ඇති වූ ගංවතුර ආපදාවෙන් පසු හානි වූ ජලාශ සහ ඇළ මාර්ග කඩිනමින් යථා තත්ත්වයට පත් කර කුඹුරු සහ වගා බිම් වෙත ජලය සැපයීම සඳහා මේ වන විට කටයුතු කරමින් පවතින බව වාරිමාර්ග දෙපාර්තමේන්තුව පවසයි.

එම දෙපාර්තමේන්තුවේ වාරිමාර්ග අධ්‍යක්ෂ ජල විද්‍යා හා ආපදා කළමනාකරණ ඉංජිනේරු එල්.එස් සූරියබණ්ඩාර මහතා පැවසුවේ ප්‍රධාන ආපදාවන් සිදුවූ ස්ථාන මෙන්ම හානි වූ ස්ථාන තාවකාලිකව හෝ සකස් කර ජලය නිදහස් කිරීම මගින් හානි වූ කුඹුරු ආරක්ෂා කර ගැනීම සඳහා වාරිමාර්ග දෙපාර්තමේන්තුව මේ වන විටත් කටයුතු ආරම්භ කර ඇති බවය.

හානි වූ ස්ථාන මෙන්ම ඇළ මාර්ග නැවත පිළිසකර කිරීම ආරක්ෂක අංශ, ගොවීන් මෙන්ම ස්වේච්චා සංවිධාන සහායද ලැබී ඇති බවත් කඩිනමින් එය සකස් කිරීමෙන් පසු අදාළ ව්‍යාපාරවල කටයුතු සඳහා ජලය නිදහස් කිරීම සිදුකරනු ඇති බවත් ඉංජිනේරු එල්.එස් සූරියබණ්ඩාර මහතා වැඩිදුරටත් සඳහන් කළේය.