ත්රිකුණාමලය කොටුව පාරේ පිහිටි ශ්රී සම්බුද්ධ ජයන්ති බෝධිරාජ විහාරස්ථ භූමියේ තැන්පත් කර තිබූ බුද්ධ ප්රතිමාවක් ඉවත් කිරීමට පොලිසිය පියවර ගැනීමත් සමඟ ඊයේ රාත්රියේ එහි නොසන්සුන් තත්ත්වයක් ඇති විය.
ත්රිකුණාමලය කොටුව පාරේ පිහිටි ශ්රී සම්බුද්ධ ජයන්ති බෝධිරාජ විහාරය 1951 වසරේදී බෞද්ධ කටයුතු දෙපාර්තමේන්තුවේ ලියාපදිංචි කර ඇති බෞද්ධ විහාරස්ථානයකි.
එහි පවත්වාගෙන ගිය ශ්රී සම්බුද්ධ ජයන්ති බෝධිවර්ධන දහම් පාසල සුනාමි ව්යසනයෙන් විනාශයට පත්ව තිබු අතර යළි එහි කටයුතු ආරම්භ කිරීමට විහාරාධිපති පූජ්ය ත්රිකුණාමලයේ කල්යාණවංසතිස්ස හිමියන් සහ දායක පිරිස් තීරණයක් ගෙන තිබුණි.
ඊයේ උදෑසන ඊට අදාළව මුල්ගල තැබීම සිදුකර පස්වරුව වන විට එම ස්ථානයේ බුද්ධ ප්රතිමාවක් තැන්පත් කිරීමටද පිරිස කටයුතු කර තිබුණේ ඒ අනුවය.
නමුත් මෙම ඉදිකිරීම් අනවසර බවට වෙරළ සංරක්ෂණ දෙපාර්තමේන්තුව පොලීසියට පැමිණිල්ලක් කර ඇති බවට පොලිසිය ස්වාමීන් වහන්සේට දැනුවත් කර ඇත.
මෙවැනි පසුබිමක එම භූමියේ තැන්පත් කෙරුණු බුද්ධ ප්රතිමාව ඉවත්කිරීමට පොලිසිය ඊයේ රාත්රියේ කටයුතු කර ඇති අතර එහිදී මෙසේ හිමිවරුන්ගෙන් සහ ප්රදේශවාසීන්ගෙන් පොලිසියට විරෝධතා එල්ල වී තිබේ.
සිද්ධියෙන් තුවාල ලැබූ බව පවසමින් විහාරාධිපති ස්වාමීන් වහන්සේ සහ තවත් ස්වාමීන් වහන්සේ නමක් මේ වන විට රෝහල්ගතව ප්රතිකාර ලබන බවද වාර්තා වේ.
කෙසේ වෙතත් මහජන ආරක්ෂක අමාත්ය ආනන්ද විජේපාල මහතා අද පාර්ලිමේන්තුවේදී ප්රකාශ කළේ බුද්ධ ප්රතිමා වහන්සේට හානියක් සිදුකරන බවට ලද යම් තොරතුරක් අනුව ප්රතිමා වහන්සේගේ ආරක්ෂාව වෙනුවෙන් අදාළ ක්රියාමාර්ගය ගත් බවය.
