ජපානයේ රිච්ටර් මාපකයේ 6.0ක භූමිකම්පාවක්

ජපානයේ තෙවන විශාලම දූපත ලෙසින් සැලකෙන කියුෂු දූපත ආසන්නයේ රිච්ටර් මාපකයේ 6.0ක භූමිකම්පාවක් ඇති වූ බව එරට භූකම්පන විද්‍යා මධ්‍යස්ථානය පවසයි. 

ජපාන වේලාවෙන් අද (2) ප.ව. 7.34ට පමණ මෙම භූමිකම්පාව ඇතිව ඇති අතර, එය කියුෂු දූපතට කිලෝමීටර 40ක් පමණ ගැඹුරින් සිදුව ඇත.

කෙසේ නමුත් මෙම භූමිකම්පාවෙන් ජීවිත හානි හෝ අනෙකුත් හානි පිළිබඳ මෙතෙක් තොරතුරු වාර්තා වී නොමැත.

ජපාන රජය ඊයේ (1) නිකුත්කළ වාර්තාවක සඳහන් වූයේ එරට තුළ ඉදිරියේදී ප්‍රබල භූමිකම්පාවක් ඇතිවීමේ අවදානමක් ඇති බවයි.

එම භූමිකම්පාව රිච්ටර් මාපකයේ ඒකක 8ත් 9ත් අතර අගයක් ගත හැකි බව එම වාර්තාවල සඳහන් විය.

ජපාන රාජ්‍ය එම වාර්තාවේ වැඩිදුරටත් සඳහන් කර තිබුණේ, එම භූමිකම්පාව ඇතිවීමේ ඉඩ 80%ක් බවත්, ඉන් ජීවිත ලක්ෂ 3කට ආසන්න සංඛ්‍යාවක් අහිමිවිය හැකි බවයි.

පසුගිය සිකුරාදා (28) මියන්මාරයට ඇති වූ රිච්ටර් මාපකයේ 7.7ක ප්‍රබලත්වයකින් යුත් භූමිකම්පාවකින් එරට ගොඩනැගිලි රැසක් බිමට සමතලා වූ අතර, 2,800කට වැඩි පිරිසක් මිය ගියේය.

එම භූමිකම්පාවෙන් දින කිහිපයකට ජපානයේ මෙම භූමිකම්පාව ඇතිවිය.