අනුරාධපුර ශික්ෂණ රෝහලේ අඩුපාඩු රැසක් සෞඛ්‍ය ඇමති හෙළිකරයි
March 12, 2025 07:56 pm
අනුරාධපුර ශික්ෂණ රෝහල් පරිශ්‍රයේදී වෛද්‍යවරියක්ව දූෂණයකිරීමට එරෙහිව එම රෝහලේ සියලුම කාර්ය මණ්ඩල ඊයේ (11) දහවල් සිට ආරම්භකර තිබෙන වෘත්තිය ක්‍රියාමාර්ගය සම්බන්ධයෙන් සෞඛ්‍ය අමාත්‍යවරයා අද (12) පාර්ලිමේන්තුවේ දී සිය ස්ථාවරය පැහැදිලි කළේය.
රෝහල් පරිපාලනයට චෝදනාකරමින් අමාත්‍යවරයා පවසා සිටියේ, මෙම සිදුවීම බැරෑරුම්ව සලකා රජය ක්‍රියාමාර්ග ගණනාවක්ම ගත් බවයි.
ඒ අනුව අදාළ සැකකාර පුද්ලගලයා අත්අඩංගුවට ගැනීමෙන් පසුවත් වර්ජනය ක්‍රියාත්මක කිරීම යුක්තිසහගත නොවන බව පැවසීය.
එනිසා වර්ජනය දැන් වුවද නතරකිරීමේ හැකියාව තිබෙන බව අමාත්‍යවරයා පෙන්වා දුන්නේය.
මේ පිළිබඳ තවදුරටත් අදහස් දැක් වූ අමාත්‍යවරයා,
"මම ඊයේ රාත්‍රියේම එම ප්‍රදේශයට ගියා. අද උදෑසන ඉදලා පුද්ගලිකව ඒ අයගේ ආරක්ෂාව ගැන සොයා බැලුවා. හඳුනාගත් අඩුපාඩු කිහිපයක් තිබෙනවා.
මේ තරම් බරපතළ නොවුණත් මෙම සිදුවීමට ආසන්න සිදුවීම් කිහිපයක් පසුගිය වසර කිහිපයේම මේ රෝහල් පරිශ්‍රයේ සමහර නිල නිවාස ආසන්නයේ සිදුවෙලා.
මේවා සෞඛ්‍ය අමාත්‍යාංශ මට්ටමින් විසදන්න ඕන ප්‍රශ්න නෙමෙයි. රෝහල් පරිපාලනය මැදිහත්වෙලා ඒකට අවශ්‍ය කටයුතු සිදුකළ යුතුයි.
නමුත් අපි දකිනවා පසුගිය වසර කිහිපය තුළ මේ වැඩබලන අධ්‍යක්ෂකවරයා, රෝහල් පරිපාලනය මේ සඳහා අවශ්‍යකරන ක්‍රියාමාර්ග අරගෙන නෑ. ඒ අය තමන්ගේ වගකීම ඉටුකළා නම් මේ තරම් මේ සිදුවීම් දුරදිග යන්නේ නෑ.
අපි රජයක් හැටියට මේ සිදුවීම බැරෑරුම්ව සලකලා ක්‍රියාමාර්ග ගණනාවක් ගනිමින් තිබියදීත් මේ වර්ජනය ක්‍රියාත්මක කිරීම යුක්තිසහගත නෑ.
පුද්ලගලයා අත්අඩංගුවට ගත්තාට පස්සෙත් වැඩවර්ජනය නතරකිරීමේ හැකියාව තිබුණා. ඒ නිසා දැන් වුණත් මේ වර්ජනය නතර කිරීමේ හැකියාවක් තියෙනවා" යනුවෙන් පැවසීය.
සිය කාර්ය මණ්ඩලයේ වෛද්‍යවරියක් දූෂණය කිරීමට එරෙහිව අනුරාධපුර ශික්ෂණ රෝහලේ සියලුම වෛද්‍යවරු, වෛද්‍යවරියන්, හෙද හෙදියන් ඇතුළු සෞඛ්‍ය කාර්ය මණ්ඩල ඊයේ දහවල් සිට අඛණ්ඩ වෘත්තිය ක්‍රියාමාර්ගයකට අවතීර්ණ වී සිටියි.
එවන් පසුබිමක සෞඛ්‍ය අමාත්‍ය වෛද්‍ය නලින්ද ජයතිස්ස මහතා අනුරාධපුර ශික්ෂණ රෝහලට පැමිණ තත්ත්වය පිළිබඳ අද විමසා බැලීමක් සිදුකළේය.
ඉන්අනතුරුව අමාත්‍යවරයා පැමිණියේ වෛද්‍යවරිය දූෂණයට ලක්වූ නිල නිවස පරිශ්‍රය ද පරීක්ෂාවට ලක්කළේය.
