අර්ච්චුනාව අත්අඩංගුවට ගන්න පොලීසිය බයයි ද ?

පාර්ලිමේන්තු මන්ත්‍රී රාමනාදන් අර්ච්චුනා මහතා පුද්ගලයෙකුට පහරදීමේ සිදුවීම සම්බන්ධයෙන් ඔහුට එරෙහිව නීතිය ක්‍රියාත්මක කරන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා පවසයි.

"අද දෙරණ" බිග්ෆෝකස් වැඩසටහනට එක්වෙමින් පොලිස් මාධ්‍ය ප්‍රකාශකවරයා මේ බව සඳහන් කළේය.

මෙහිදී වැඩිදුරටත් අදහස් දැක්වු ජ්‍යෙෂ්ඨ පොලිස් අධිකාරී බුද්ධික මනතුංග මහතා,

ප්‍රශ්නය - තවදුරටත් ඔහු මන්ත්‍රීවරයෙක් ලෙස ඔහුගේ වරප්‍රසාද භුක්ති විඳිමින් ඉන්නවා. ඔහු අත්අඩංගුවට ගත්තා ද ? පොලීසිය අත්අඩංගුවට ගන්නේ නැද්ද? බයයි ද?

"පාර්ලිමේන්තු මන්ත්‍රීවරයෙක් වීම හේතුවෙන් ඔහුට නීතියෙන් ගැලවී යෑමට හෝ කිසිදු විශේෂ වරප්‍රසාදයක් ලබාදීලා නෑ. උත්තරීතරම ආයතනයේ පුද්ගලයෙක් ඔහු. ඔහුගේ හැසිරීම ඉතාමත්ම ගෞරවනීය විය යුතුයි. ඒක තමා මහජනතාව බලාපොරොත්තු වෙන්නේ. පොලීසියේ හැසිරීම බලාපොරොත්තු වෙනවා වගේම මහජනතාව ඔවුන්ගේ හැසිරීමත් බලාපොරොත්තු වෙනවා. ඉතින් ඒ ආකාරයෙන් ක්‍රියාකිරීම ඔහු සතු කාර්යයක්. කෙසේවෙතත් ඔහු නීතියට එරෙහිව ක්‍රියාකරනවා නම් අපි නීතිය ක්‍රියාකරනවා. ඉදිරියේදී බලන්න පුළුවන් ඔය සිදුවීම සම්බන්ධයෙන් පවත්නා නීතියට අනුකූලව ශ්‍රී ලංකා පොලීසිය කටයුතු කරනවා."

පාර්ලිමේන්තු මන්ත්‍රී රාමනාදන් අර්ච්චුනා මහතා සිදුකළ පහරදීමකින් තුවාල ලැබූ පුද්ගලයෙකු මේවන විට යාපනය රෝහලේ ප්‍රතිකාර ලබමින් සිටී.

එම පහරදීම සිදුව තිබුණේ යාපනයේ පිහිටි පෞද්ගලික ආපන ශාලාවක් තුළදීය.

මන්ත්‍රීවරයා සිදුකළ පහරදීම සීසීටීවී කැමරාවක ද සටහන්ව තිබුණි.