දකුණු අප්‍රිකානු ක්‍රීඩිකාවෝ අවසන් සටනට
January 31, 2025 01:50 pm
මැලේසියාවේ පැවැත්වෙන අවුරුදු 19න් පහළ කාන්තා විස්සයි20 ලෝක කුසලාන ක්‍රිකට් තරගාවලියේ අවසන් මහා තරගයට සුදුසුකම් ලබාගැනීමට දකුණු අප්‍රිකානු කාන්තා කණ්ඩායම අද (31) සමත් විය.
තරගාවලියේ පළමු අවසන් පූර්ව තරගය ලෙසින් ක්වාලාලාම්පූර්හිදී පැවති මෙම තරගයේදී ඔස්ට්‍රේලියානු කාන්තා කණ්ඩායයම කඩුලු 5කින් පරාජය කිරීමට දකුණු අප්‍රිකානු යොවුන් ක්‍රීඩිකාවන්ට හැකිවිය.
පළමුවෙන් පන්දුවට පහරදුන් ඔස්ට්‍රේලියානු කණ්ඩායම පන්දුවාර 20 තුළදී කඩුලු 8ක් දැවී ලකුණු 105ක් රැස්කළේය.
ඒ අනුව ලකුණු 106ක ඉලක්කයක් හඹාගිය දකුණු අප්‍රිකාව කඩුලු 5ක් දැවී තිබියදී තරගයේ 19(18.1)වන පන්දුවාරයේදී එම ඉලක්කය සම්පූර්ණ කරගැනීමට සමත් විය.
දකුණු අප්‍රිකානු යොවුන් කාන්තා කණ්ඩායමක් විස්සයි20 ලෝක කුසලාන තරගාවලියක අවසන් මහා තරගයට සුදුසුකම් ලබාගත් පළමු අවස්ථාව මෙයයි.
මෙම තරගාවලියේ දෙවන අවසන් පූර්ව තරගය වත්මන් ශූරියන්වන ඉන්දියාව හා එංගලන්තය අතර මේ වනවිට පැවැත්වේ.
